Tíska og hönnun

Yfirhöfn sem nota má á 112 mismunandi vegu

Sara McMahon skrifar
Hrefna Björk Sverrisdóttir, Ýr Þrastardóttir og Harpa Einarsdóttir stofnuðu hönnunarfyrirtækið YZ Creations. Fyrirtækið hannar flíkur sem má nota á ólíka vegu.
Hrefna Björk Sverrisdóttir, Ýr Þrastardóttir og Harpa Einarsdóttir stofnuðu hönnunarfyrirtækið YZ Creations. Fyrirtækið hannar flíkur sem má nota á ólíka vegu. Myndir/jónatan Grétarsson

YZ Creation er nýtt hönnunarfyrirtæki í eigu Hrefnu Bjarkar Sverrisdóttur og hönnuðanna Ýrar Þrastardóttur og Hörpu Einarsdóttur. Fyrirtækið hyggst framleiða hágæða flíkur sem hægt er að breyta og nota á fleiri en eina vegu.

„Ýr og Harpa voru búnar að ákveða að vinna saman og settu sig í samband við mig. Okkur langaði að gera eitthvað nýtt í hönnun, eitthvað sem ekki væri búið að gera áður, og datt í hug hvort hægt væri að framleiða hágæða flíkur sem nota mætti á marga vegu. Áskorunin var aftur á móti sú hvort hugmyndin væri framkvæmanleg; hvort flíkurnar mundu standast kröfur um gæði og hönnun,“ útskýrir Hrefna Björk.

Úr varð yfirhöfn sem hægt er að nota á 112 mismunandi vegu með því að taka af eða bæta á ermum, krögum, hettum og öðrum fylgihlutum. Ætlunin er að framleiða nýja fylgihluti á tveggja mánaða fresti. Stefnt er á að fyrsta lína YZ Creation líti dagsins ljós árið 2015.

„Þróunar- og framleiðsluferlið er langt og flókið og því kemur fyrsta línan ekki út fyrr en árið 2015. Allar flíkurnar í línunni eru hannaðar í þeim tilgangi að viðskiptavinurinn geti breytt þeim,“ útskýrir Hrefna Björk.

Fashion, Yz creation yz creation

Keppa í Creative Business Cup 2013
Stúlkurnar voru eitt af tíu nýsköpunarverkefnum sem tóku þátt í Startup Reykjavík í sumar og nýttu þann tíma til að fullmóta viðskiptaáætlun sína. Í september var þeim boðin þátttaka í Creative Business Cup 2013 sem fram fer í Kaupmannahöfn í lok nóvember. Þar keppa um 40 sprotafyrirtæki um heimsmeistaratitilinn í Entrepreneurship in Creatative Intustries, eða í frumkvöðlastarfi.

„Við verðum með stanslausar kynningar í þrjá daga fyrir fjárfesta. Þetta er frábært tækifæri til að kynna okkur, sjá hvernig landið liggur og kynnast öðrum sprotafyrirtækjum,“ segir Hrefna Björk að lokum.

Hér að neðan má sjá myndband frá YZ Creation.

Video from Yr Thrastardottir on Vimeo.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.