Lífið

Vesturport og Nick Cave gera nýja leikgerð af Faust

Vesturportsfólkið Gísli Örn Garðarsson, Björn Hlynur Haraldsson, Nína Dögg Filippusdóttir og Víkingur Kristjánsson vinnur nú að nýrri leikgerð Faust ásamt tónlistarséníunum Nick Cave og Warren Ellis. Sýningin verður svo sett upp í Berlín, Hamborg og London.
Vesturportsfólkið Gísli Örn Garðarsson, Björn Hlynur Haraldsson, Nína Dögg Filippusdóttir og Víkingur Kristjánsson vinnur nú að nýrri leikgerð Faust ásamt tónlistarséníunum Nick Cave og Warren Ellis. Sýningin verður svo sett upp í Berlín, Hamborg og London.

„Þetta er búið að vera í þróun í svolítinn tíma, hefur fengið að gerjast í hausnum á manni á hliðar­línunni. En núna er vinnan hafin," segir Gísli Örn Garðarsson, leikari og leikstjóri. Vestur­portshópurinn vinnur þessa dagana að nýrri leikgerð Faust sem verður jólasýning Borgarleikhússins í ár. Gísli Örn situr nú við að skrifa handritið ásamt þeim Víkingi Kristjánssyni, Birni Hlyni Haraldssyni og Nínu Dögg Filippusdóttur. „Og svo verða Nick Cave og Warren Ellis með tónlistina. Hún spilar stórt hlutverk," segir Gísli.

Gísli segir erfitt að segja til um hvernig Faust þau muni setja upp. „Það eru til margar leikgerðir og sögur og við höfum verið að sanka að okkur öllu sem er til um þetta. Út frá því reynum við að finna kjarnann í sögunni og skrifum í kjölfarið," segir hann. Hingað til hefur Vesturport verið þekkt fyrir óvenjulegar uppsetningar sínar á þekktum verkum. Gísli fæst ekki til að vera með neinar yfirlýsingar um að svo verði nú. „Það er eiginlega skemmtilegra ef það fær bara að koma í ljós. Það er svo sem ekkert nýtt undir sólinni. Við ætlum bara að búa til Faust sem er okkar Faust - eins og við viljum sjá það."

Gísli Örn verður leikstjóri verksins en ekki er enn farið að ræða hlutverkaskipan. Hópurinn situr nú sveittur við handritsskrifin á Kolsstöðum í Hvítársíðu í Borgarfirði. Þar eru þau í sambandi við Warren Ellis og Nick Cave í gegnum Skype.

Þó að Faust verði jólasýning í Borgarleikhúsinu mun verkið ekki stoppa lengi þar. „Við gerum þetta líka í samstarfi við leikhús í Berlín, Hamborg og London, þau vildu tengjast þessu líka. Svo fer það eftir því hvernig tekst til hvort fleiri hafa áhuga. Það skemmir allavega ekki fyrir að hafa Nick Cave með."


















Fleiri fréttir

Sjá meira


×