Ísraelskir landamæraverðir ætluðu að neita Dorrit Moussaief forsetafrú að fara úr landi í gær eftir stutta heimsókn. Hún fékk ekki að halda áfram för sinni fyrr en rætt hafði verið við ræðismann Íslands í Ísrael.

Dorrit Moussaieff forsetafrú var á heimleið úr nokkurra daga ferðalagi í Ísrael þar sem hún er fædd. Landamæraverðir stöðvuðu hana þegar hún framvísaði bresku vegabréfi og kröfðust þess að hún framvísaði ísraelsku vegabréfi. Forsetafrúin er breskur ríkisborgari en samkvæmt ísraelskum lögum verða allir þeir sem eru fæddir í Ísrael að framvísa ísraelsku vegabréfi. Landamæraverðirnir meinuðu henni því að halda för sinni áfram fyrst um sinn.

Samkvæmt upplýsingum NFS leystist málið eftir að haft var samband við ræðismann Íslands í Tel Aviv, sem reyndar er staddur hér á landi á ráðstefnu ræðismanna Íslands erlendis. Jafnframt var haft samband við íslenska sendiráðið í Kaupmannahöfn. Sendiherrann þar er jafnframt sendiherra Íslands í Ísrael.

Dorrit er komin aftur til Íslands. Hún sagði í viðtali við Fréttastofu Sjónvarpsins að henni hefði runnið í skap þegar einn landamæravarðanna spurði hvernig hún gæti verið gift manni sem væri ekki gyðingur. Þá svaraði hún því til að þetta væri ástæðan fyrir því að öllum væri illa við gyðinga.

Myndir náðust af atvikinu og voru leiknar í ísraelskum fjölmiðlum í dag. Fréttastjóri ísraelsku sjónvarpsstöðvarinnar Stöð 10 sagði í samtali við NFS að málið hefði vakið mikla athygli í Ísrael í dag og myndband af atburðinum farið víða um heim. Forsetafrúin var í símaviðtali á Stöð 10 í dag og gerði þar grein fyrir sinni hlið málsins á hebresku. Fréttastjórinn átti ekki von á að nein eftirmál yrðu vegna uppákomunnar.