Forstjóri Bankasýslunnar telur ráðuneytisstjóra hafa brotið lög

Seinasta sumar hafði Guðmundur Árnason, ráðuneytisstjóri í fjármálaráðuneytinu, tvívegis beint samband við Jón Gunnar Jónsson, forstjóra Bankasýslu ríkisins og reyndi að hafa áhrif á val á stjórnarformanni íslensks fjármálafyrirtækis. Þá beindi ráðuneytisstjórinn jafnframt þeim tilmælum til forstjórans að hann beitti sér fyrir því að umrætt fyrirtæki frestaði stjórnarfundi.

Þetta kemur fram í umsögn bankasýslunnar um frumvarp um sölu og meðferð eignarhluta ríkisins í fjármálafyrirtækjum. Í umsögninni kemur ekki fram um hvaða fjármálafyrirtæki var að ræða en forstjóri Bankasýslunnar mótmælti þessum afskiptum ráðuneytisstjórans og taldi þau ekki í samræmi við lög. Upplýsti hann stjórn stofnunarinnar án tafar um afskiptin.

Í umsögninni kemur fram að afskipti ráðuneytisstjórans séu „einkum alvarleg í ljósi þess að samkvæmt lögum nr. 161/2002 um fjármálafyrirtæki og samþykktum þeirra er það hlutverk kjörinnar stjórnar að skipta með sér verkum og kjósa sér formann, en ekki eigenda nema samþykktir kveði svo á um, og hlutverk stjórnarformanns að boða til stjórnarfunda, en ekki eigenda.“

Segir í umsögninni að ráðuneytinu ætti að vera fullkunnugt um þetta þar sem löggjöf um fjármálafyrirtæki séu á forræði þess.

Reynsla Bankasýslunnar af þessum samskiptum sínum við fjármála-og efnahagsráðuneytið sýna „að raunveruleg hætta er á því hjá ráðuneytinu að því reynist erfitt að skilja á milli faglegrar starfsemi og annars konar hagsmunagæslu þegar kemur að málefnum íslenskra fjármálafyrirtækja í eigu ríkissjóðs.“

Því sé það mikilvægt að láta sjálfstæða stofnun halda utan um eigandahlutverk ríkisins í fjármálafyrirtækjum þar sem eftirlits- og stefnumótunarhlutverk varðandi fjármálafyrirtæki heyri nú undir fjármálaráðuneyti, líkt og Bankasýslan.

„Er því ríkari hætta en áður á hagsmunaárekstrum á milli eftirlitshlutverks ríkisins og eigandahlutverks þess, en með áframhaldandi starfsemi Bankasýslu ríkisins yrði aðskilnaður tryggður eftir að þessi tvö hlutverk féllu undir sama ráðuneyti,“ segir í umsögn Bankasýslunnar.