Ekki lúxusferðalög

Sigrún Elsa Smáradóttir, borgarfulltrúi og stjórnarmaður í Orkuveitu Reykjavíkur, segir að hún hafi í stöfum sínum í þágu borgarbúa kappkostað að upplýsa almenning um starfsemi orkufyrirtækjanna eins mikið og vel og mögulegt er. Ferðir á vegum Orkuveitunnar séu ekki lúxusferðalög.

Ferðalög fjögurra stjórnarmanna Orkuveitu Reykjavíkur á síðustu tveimur árum kostuðu samtals nærri sjö milljónir króna. Fjallað var um málið í fréttum Stöðvar 2 í kvöld. Kostnaðartölur síðustu tveggja ára, sem DV greinir frá í dag, og Stöð 2 fékk einnig frá Orkuveitunni, eru jafnframt fyrir ferðir á vegum dótturfélagsins REI.

„Starfsemi REI er eingöngu á erlendum vettvangi og því ekki hjá því komist að stjórnarmenn fari í vinnuferðir til að sinna störfum sínum. Ég hef á kjörtímabilinu farið í tvær slíkar ferðir," segir Sigrún Elsa í tilkynningu þar sem hún mótmælir því að í frétt Stöðvar 2 sé látið að því liggja að um einhverskonar lúxusferðalög eða heimsreisur á kostnað almennings sé að ræða. Svo sé ekki.

„Ferð minni til Asíu og Afríku, sem var sú kostnaðarsamasta, var gerð ítarleg skil, að mínu frumkvæði, í tveggja síðna viðtali í 24 stundum skömmu eftir að henni lauk. Þar var fjallað um starfsemi fyrirtækisins sem fram að því hafði verið lítt skýrð fyrir almenningi, segir borgarfulltrúinn.

Sigrún Elsa segir að hún hafi reynt að halda störfum sínum í þágu borgarinnar eins opinberum og kostur er á. Hún hafi reynt að upplýsa almenning um starfsemi orkufyrirtækjanna.

„Þannig tel ég óvíst að aðrir borgarfulltrúar hafi birt jafnmargar greinar og ég um starfssemi þessara fyrirtækja eða átt jafn ríkan þátt í að vafasöm áform um viðskipti með eigur almennings urðu opinber. Það hef ég gert með því að kynna mér af vandvirkni þá starfsemi sem mér hefur verið trúað fyrir. Ég vil þó taka fram að ég sá hvorki um skipulag þeirra ferða sem um ræðir né bókanir," segir Sigrún Elsa og hvetur fólk til að lesa greinar hennar um Orkuveituna og REI á heimasíðu sinni, sigrunelsa.is.