Dottaði undir stýri og keyrði útaf: "Við vorum rosalega heppnir"

„Við vorum rosalega heppnir," segir Ágúst Friðjónsson sem dottaði undir stýri þegar hann ók heim á Sauðárkrók frá Akureyri aðfaranótt laugardags.

Bíllinn sem Ágúst ók fór útaf veginum og kastaðist til. Bíllinn, sem er í eigu vinar hans, er nú gjörónýtur og þakka Ágúst og vinir hans fyrir að ekki hafi farið verr. Ágúst segist hugsa mikið um hvað hefði getað gerst. Hann rifjar bílferðina frá Akureyri upp með blaðamanni:

„Við vorum á leiðinni heim frá Akureyri. Ég fann að ég var þreyttur og var búinn að stoppa einu sinni til þess að fá frískt loft og koma blóðinu á hreyfingu. Við vorum búnir að ákveða að stoppa í Varmahlíð, þar sem ég ætlaði að fá mér hressingu og fríska mig við."

En félagarnir komust aldrei í Varmahlíð.

Sjá líka: Fjórir hafa látið lífið á Íslandi í kjölfar þess að ökumaður sofnaði undir stýri frá árinu 2006.

„Við vorum um tíu til tuttugu kílómetra frá Varmahlíð þegar ég dottaði. Við komum að beygju en bíllinn fór bara beint áfram. Ég vaknaði við að vinur minn sem sat í farþegasætinu kallaði nafnið mitt. Þá var það orðið of seint," segir hann og heldur áfram:

„Bíllinn fór beint í kannt á skurði sem var þarna við veginn. Þaðan kastaðist hann hátt upp í loftið, yfir grindverk sem þarna var og snerist í loftinu. Við lentum svo, sem betur fer, á hjólunum. Þetta hefði getað farið svo miklu verr."

Allir fjórir voru í belti og segir Ágúst það hafa bjargað þeim. „Ég er alveg viss um það,“ bætir hann við.

Ágúst segir að hann og vinir hans þrír hafi sloppið með teljandi meiðsl. Einn vinur hans braut tennur og bein í andliti, annar fékk skurð.

„En svo fengum við allir hnykk á hálsinn,“ bætir hann við

Vonast til að aðrir geti lært af sínum mistökum

Ágúst vonast til þess að geta miðlað reynslu sinni til annarra ökumanna. „Mistökin sem ég gerði voru bara þau að stoppa ekki strax og ég fann fyrir þreytunni. Við áttum ekki mikið eftir í Varmahlíð, þar sem við hefðum stoppað. En það skiptir engu máli. Maður á bara að stoppa strax. Þegar maður er að keyra lengi er mikilvægt að stoppa reglulega," segir hann og bætir við:

„Ég vona bara að allir geti lært af þessu. Ég get ekki lagt næga áherslu á þetta; það er gríðarlega mikilvægt að stoppa. Þetta getur komið fyrir alla. Allir verða að fara varlega.“

Hann segist hugsa mikið um slysið og hvernig hlutirnir hefðu getað þróast öðruvísi. „Þetta er búið að hafa rosalega mikil áhrif á okkur. Við vorum náttúrulega ofboðslega heppnir að lenda á dekkjunum. Annars hefði þetta getað farið miklu, miklu verr."

Ellefu ráð frá Samgöngustofu

Þórhildur Elínardóttir, upplýsingafulltrúi Samgöngustofu, tiltekur ellefu ráð fyrir ökumenn, til þess að koma í veg fyrir að þeir dotti undir stýri:



1.Fáið góðan nætursvefn fyrir akstur, helst 8 klst.

2.Takið hlé frá akstri á hverjum 160 km eða á tveggja stunda fresti í langferðum

3.Látið blása köldu í miðstöðinni

4.Hafið með ykkur ferðafélaga sem getur fylgst með ykkur og gætt að þreytueinkennum

5.Forðist áfengi og sljóvgandi lyf

6.Ef þið eruð þreytt takið ykkur þá lúr eða drekkið drykk sem inniheldur koffín áður en þið farið af stað 

7.Ráðfærið ykkur við lækni ef þið eruð oft syfjuð á daginn eða eigið erfitt með að sofa um nætur

8.Ef syfja leitar á stöðvið aksturinn, farið útaf veginum á öruggum stað og sofnið augnablik, 15 mín ætti að nægja

9.Látið farþega taka við akstrinum

10.Drekkið drykk sem inniheldur koffín

11.Treystið ekki á ,,ráð gegn syfjuakstri

Á vef forvarnarhússins má einnig finna ráðleggingar til að koma í veg fyrir að maður sofni undir stýri. Þar segir meðal annars:



„* Ekki aka of lengi í einu. Hvíldu þig öðru hverju við aksturinn, teygðu fæturna og andaðu að þér fersku lofti.



* Finnir þú til þreytu skaltu stöðva bílinn þar sem hann veldur ekki hættu og leggja þig í 15-20 mínútur.„



Hér að neðan má sjá myndband með fleiri ráðleggingum.