Búið að finna bílinn sem var stolið á Kársnesi

„Lögreglan er búin að finna bílinn, það var búið að hreinsa allt út úr honum," segir Kristrún Júlíusdóttir íbúi á Kársnesi í Kópavogi. Við sögðum frá því 14. júlí síðastliðinn að bílnum hennar var stolið þegar að hún hleypti kettinum sínum út klukkan fimm um morgun. Þjófurinn fór inn í húsið og tók bíllyklana eftir að Kristrún skyldi eftir litla rifu á útidyrahurðinni. Bíllinn hefur verið týndur síðan en er nú kominn í leitirnar.

Lögreglan á höfuðborgarsvæðinu fann bílinn á Ásbryggju í Grafarvogi en þar stóð hann ólæstur. „Það var eiginlega ekkert búið að keyra hann, allavega samkvæmt bensínmælinum." Samkvæmt Kristrúnu var myndavél, fullt af geisladiskum, gleraugum, hlaupahjóli og allir pappírar sem voru í hanskahólfinu stolið. „En geisladiskaspilarinn var látinn í friði."

Kristrún hefur haft samband við tryggingafélag og er það mál í vinnslu. Hún segir það skrítna tilfinningu að einhverjir aðilar hafi verið inn í bílnum hennar. „En hann er heill, það er fyrir öllu." Hún segir kisa kátan yfir því að bíllinn sé fundinn. „Kötturinn er kátur að sjálfsögðu, en ég held að hann fari ekki út á morgnanna eftir þessa lífsreynslu."