Boðað til mótmæla vegna komu Franklins Graham

Boðað hefur verið til mótmæla vegna komu predikarans umdeilda Franklins Graham á Hátíð vonar í Laugardalshöll í september. Bera mótmælin yfirskriftina „Gleði- og samstöðuhátíð“ og vill forsvarsmaður þeirra koma þeim skilaboðum áleiðis að hentugri einstakling hefði mátt finna til að koma fram á hátíðinni.

Graham er, eins og áður hefur verið greint frá, þekktur fyrir skoðanir sínar á samkynhneigð og öðrum trúarbrögðum en hans eigin og mótmæltu fjölmargir komu hans með því að taka frá miða á samkomuna án þess að ætla að mæta á hana.

Davíð Brynjar Sigurjónsson, skipuleggjandi mótmælanna, vill þó taka það fram að ekki sé verið að mótmæla hátíðinni sjálfri heldur eingöngu komu predikarans. Hann telur aðkomu Graham að hátíðinni ekki í takt við boðskapinn.

„Það sem sagt er að hátíðin standi fyrir er að boða orð Guðs og skilyrðislausan kærleika hans til allra manna og það er alls ekki það sem Graham hefur verið að predika. Því skil ég ekki hvers vegna hann er fenginn til að koma fram,“ segir Davíð sem aðspurður segist þó ekki vera trúaður.

Hann var meðal þeirra sem mótmæltu með því að taka frá miða, en allir pantaðir miðar voru ógiltir í vikunni vegna „misnotkunar ýmissa aðila á miðasölu hátíðarinnar“. Hann segist þó aðeins hafa tekið frá einn miða.

Davíð segir að um friðsamleg mótmæli sé að ræða og segir tilvalið að mæta á staðinn, til dæmis í „Gay-pride gallanum“. „Þetta snýst mest um nærveruna og að láta vita af sér,“ segir Davíð.