Báru upp tillögu um nýjan landsfund

Hafin er umræða innan framkvæmdastjórnar Samfylkingarinnar um hvort æskilegt sé að flýta landsfundi flokksins. Borin var upp tillaga á framkvæmdastjórnarfundi flokksins fyrir skömmu þess efnis að flýta landsfundi svo hægt verði að kjósa nýja forystu flokksins í allsherjaratkvæðagreiðslu.

Engin efnisleg niðurstaða var tekin um tillöguna en umræður urðu miklar um framhaldið og hvernig framkvæmdastjórn ætti að taka á málunum.

Bentu fylgjendur Árna Páls Árnasonar, sitjandi formanns flokksins, á að lög Samfylkingarinnar sniðu flokknum þröngan stakk; ekki væri hægt að halda landsfund nema annað hvert ár og ef halda ætti aukalandsfund væri ekki hægt að kjósa nýja forystu á slíkum fundi.

Sema Erla Serdar, formaður framkvæmdastjórnar Samfylkingarinnar, staðfesti þetta í samtali við blaðamann Fréttablaðsins. „Framkvæmdastjórn hefur opnað umræðu um næsta landsfund og hvenær hann verður haldinn. Síðasta landsfundarnefnd mótaði tillögu til nýrrar framkvæmdastjórnar um að umræða yrði haldin fyrr en síðar um þessi mál. Í samræmi við þær ákvarðanir munum við halda tvo stóra flokksstjórnarfundi næstkomandi haust þar sem þetta verður rætt,“ segir Sema Erla. 

Mikil ólga er enn innan Samfylkingarinnar eftir síðasta landsfund flokksins þar sem Árni Páll Árnason sigraði Sigríði Ingibjörgu Ingadóttur í kosningu til formanns með aðeins einu atkvæði. Hann hefur látið hafa það eftir sér að hann vilji sækja sér stærra umboð til að stýra skútunni en að lög flokksins hamli því að vilji hans verði að veruleika. 

„Það er alveg rétt að ákveðin öfl innan flokksins vilja nýjan landsfund þar sem flokkurinn í heild sinni getur valið sér nýja forystu. Hins vegar býr flokkurinn yfir sínum lögum og reglum og nú er vinna hafin við það að meta hvaða leiðir eru færar í stöðunni,“ segir Sema. „Ég á von á því að þessi mál sem og önnur verði rædd á næsta flokksstjórnarfundi í september.“