Frímerki með eldfjallaösku

Íslandspóstur gefur út 3 frímerki á morgun í tilefni eldsumbrotanna í Eyjafjallajökli fyrr á þessu ári. Frímerkin eru offsetprentuð á hefðbundinn hátt hjá hollensku frímerkjaprentsmiðjunni Joh. Enschedé en síðan silkiprentuð með mjög fínkorna trakíandesít ösku sem féll undir Eyjafjöllum 17. apríl 2010.

Trakíandesít er bergkvika með 60% kísilinnihald sem kemur af 7 kílómetra dýpi og er rúmlega 1100°C heit þegar hún kemst í snertingu við jökulhettuna, segir í tilkynningu.

Litið er á eldsumbrotin sem hófust í Eyjafjallajökli rétt fyrir miðnætti 20.mars 2010 sem eitt eldgos í tveimur aðskildum fösum. Í fyrri fasanum kom kvikan upp í Fimmvörðuhálsi. Gosið var tiltölulega lítið og samkvæmt jarðskjálftamælum virtist því ljúka 12. apríl. Um sólahring síðar, aðfararnótt 14. apríl, hófst gos að nýju og kom kvikan þá upp í suðvestanverðum toppgíg Eyjafjallajökuls. Þá um morguninn sáust miklir gosbólstrar sem teygðu sig 30 kílómetra í suður.

Gosaskan dreifðist um alla Evrópu og olli gríðarlegum truflunum á flugumferð í nokkra daga, hinum mestu frá lokum síðari heimsstyrjaldar. Talið er að í síðari gosinu hafi komið upp um 250 milljón kúbikmetrar af ösku. Öskufall olli miklum búsifjum á Suðurlandi. Gripið var til víðtækra rýminga og hundruð fjölskyldna fluttar tímabundið frá þeim stöðum sem verst urði úti. Þann 21. maí minnkaði gosvirkni verulega og benti það til þess að gosið væri í rénum þótt ekki væri hægt að spá goslokum.

Hönnuðir frímerkjanna eru Borgar Hjörleifur Árnason og Hany Hadaya hjá H2 hönnun. Ljósmyndir á frímerkjunum eru eftir Óskar Ragnarsson (ljósmynd frá Fimmvörðuhálsi) og  Ragnar Th. Sigurðsson (Eyjafjallajökull 2 myndir)