Eldsvoði í miðbænum: Batteríið brann

Eldur kom upp í gömlu húsi í miðborg Reykjavíkur sem hýsir meðal annars skemmtistaðinn Batteríið í Hafnarstræti. Allt tiltækt lið slökkviliðsins var kallað á vettvang og er húsið mikið skemmt. Reykkafarar fóru inn í húsið og reyndist það mannlaust. Slökkviliðinu tókst að koma í veg fyrir að eldurinn læsti sig í nærliggjandi hús en mörg sögufræg hús eru á svæðinu á borð við Gauk á Stöng, Kaffi Reykjavík og Fálkahúsið.

Þá voru gaskútar bornir út og kældir. Þrátt fyrir talsverðan eld, var slökkviliðið fljótt að ná tökum á honum, og slökkva hann, en þar er nú staðin vakt þar sem glæður kunna að leynast í húsinu.

Mikinn reyk lagði frá brunastað og barst hann vestur eftir borginni. Eldsupptök eru ókunn, en rannsókn er hafin. Húsið er stórskemmt, sem áður sagði, en það var gert upp fyrir nokkrum árum.