Assange stofnar fjölmiðlafyrirtæki á Íslandi

„Þetta er fyrirtæki sem er stofnað í tengslum við Wikileaks, það er engin starfsemi hafin, við erum ekki komnir með húsnæði og ég veit ekki hvenær starfsemi mun hefjast. Það hafa engir starfsmenn verið ráðnir og ég veit ekki hvað við verðum margir,“ segir Kristinn Hrafnsson blaðamaður. Julian Assange, oftast kenndur við Wikileaks, hefur stofnað fjölmiðlafyrirtækið Sunshine Press Productions hér á landi en þetta er sama fyrirtækjanafn og rekstraraðili Wikileaks notar.

Stofnendur fyrirtækisins ásamt Assange eru Ingi Ragnar Ingason tökumaður, Kristinn, sem hefur verið titlaður talsmaður Wikileaks í erlendum fjölmiðlum, og svo Gavin MacFadyen en sá er prófessor í blaðamennsku og mikill þungavigtarmaður í breskum fjölmiðlum. Hann var meðal annars leikstjóranum Michael Mann innan handar þegar hann gerði The Insider með Al Pacino og Russell Crowe í aðalhlutverkum.

Það hefur lengi verið í deiglunni að Wikileaks stofnaði útibú hér á landi. Assange hefur verið á hálfgerðum hrakhólum eftir að sænsk yfirvöld hófu að rannsaka ásakanir um nauðgun á hendur honum. Í viðtali við svissneska ríkissjónvarpið í byrjun nóvember sagðist Assange vera að velta því alvarlega fyrir sér að sækja um hæli í Sviss en það og Ísland væru einu löndin sem Wikileaks gæti starfað í.

Kristinn vildi ekki ræða fyrirtækið í neinum smáatriðum við Fréttablaðið, sagði tilgang þess vera framleiðslu, útgáfu og dreifingu fjölmiðlaefnis, myndefnis og prentaðs máls auk annarra hluta.- fgg