Innlent

Fréttaskýring: Skattar á bíla taka mið af umhverfinu

svavar@frettabladid.is skrifar
Fjármálaráðuneytið telur ekki ástæðu til að hvetja til innflutnings á nýjum bílum. Bílafloti þjóðarinnar sé tiltölulega nýr.fréttablaðið/vilhelm
Fjármálaráðuneytið telur ekki ástæðu til að hvetja til innflutnings á nýjum bílum. Bílafloti þjóðarinnar sé tiltölulega nýr.fréttablaðið/vilhelm

Fréttaskýring: Hvernig verður skattlagningu háttað af nýjum bílum í framtíðinni?

„Við erum að ganga frá frumvörpum þar sem verið er að breyta skattlagningu á ökutækjum og eldsneyti sem byggir á losun gróðurhúsalofttegunda. Til þessa hefur verið litið til vélarstærðar við álagningu innflutningsgjalda og þunga ökutækis við álagningu bifreiðagjalda,“ segir Sigurður Guðmundsson, aðstoðarskrifstofustjóri á tekju- og skattaskrifstofu fjármálaráðuneytisins. „Fyrsta skrefið í endurskoðun skattlagningar á ökutæki var kolefnisgjald á jarðefnaeldsneyti. Næstu skref eru bifreiða- og vörugjöld sem bæði eiga að endurspegla losun gróðurhúsalofttegunda.

Fréttablaðið sagði frá því í gær að Bílgreinasambandið leggur til að tíu ára gamla bíla megi afskrifa og eigendur þeirra fái á móti afslátt af innflutningsgjöldum á nýjum bíl. Sambandið vill sömuleiðis að innflutningsgjöld á nýjum bílum verði lækkuð. Markmiðið er að flýta endurnýjun bílaflotans og koma markaðnum á hreyfingu á ný eftir gríðarlegan samdrátt í bílasölu eftir hrun. Sala nýrra bíla dróst saman um 95 prósent á árunum 2007-2009.

„Við vitum af hugmyndum Bílgreinasambandsins um afslátt af innflutningsgjöldum á nýjum bifreiðum við afskrift eldri ökutækja. Áhugi bílainnflytjenda er skiljanlegur en bílafloti landsmanna er stór og mikill hluti hans er nýr og lítið notaður. Það er ekkert sérstakt áhugamál að auka innflutninginn í þeim tilgangi að flýta fyrir endurnýjun bílaflotans,“ segir Sigurður.

Núna er lagt 30 eða 45 prósent vörugjald á alla bíla sem fluttir eru til landsins og það fer eftir vélarstærð. Sigurður segir að í framtíðinni munu vörugjöldin geta farið allt niður í fimm prósent fyrir neyslugranna bíla sem ganga fyrir dísilolíu. Engin vörugjöld yrðu lögð á rafmagnsbíla eða tvinnbíla. Heilt yfir yrði um að ræða lækkun vörugjalda fyrir alla bíla sem teljast umhverfisvænir. „Hugmynd nýrrar álagningar er skali gjalda sem byrjar í núlli en endar hærra en það 45 prósenta hámarksvörugjald sem innheimt er í dag fyrir þá bíla sem eyða miklu eða teljast óumhverfisvænir samkvæmt skilgreiningu nýrra laga,“ segir Sigurður.

„Meiningin er að þegar uppsveifla hefst á ný verði komið á fyrirkomulag sem þýðir að þú getur flutt inn umhverfisvæn ökutæki með lægri vörugjöldum.“

Í dag er verðmyndun ökutækja með þeim hætti að þrjátíu prósent vörugjald leggst á þegar ökutæki er tollafgreitt inn í landið. Önnur álagning er frá söluaðila auk 25,5 prósenta virðisaukaskatts sem leggst við.

Bílgreinasambandið hefur jafnframt viðrað hugmyndir um endurgreiðslu á virðisaukaskatti vegna viðgerðarkostnaðar. Hefur þar verið bent á átakið Allir vinna.

Sigurður segir að átakið Allir vinna hafi haft það að leiðarljósi að efla byggingarstarfsemi sem var sú atvinnugrein sem varð fyrir þyngsta högginu í hruninu. „Þar er atvinnuleysishlutfallið hæst og menn sátu heima með miklum kostnaði fyrir samfélagið, en það er ekki okkar tilfinning að það sé raunin í bílaviðgerðum. Heldur kannski þveröfugt.“

Rök Bílgreinasambandsins um slíka aðgerð til að uppræta svarta atvinnustarfsemi segir Sigurður annað mál. „Það væri heldur að ná utan um það með hertu skatteftirliti.“

svavar@frettabladid.is



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×