Forstjóri Magma stoltur af því að geta kallað Össur „félaga“

Ásgeir Margeirsson, forstjóri Magma á Íslandi, segir að hann og Össur Skarphéðinsson utanríkisráðherra hafi þekkst lengi og samskipti þeirra hafi verið á þeim nótum. Hann segir stjórnvöld aðeins hafa verið að vinna eftir gildandi lögum og ekkert óeðlilegt sé við tölvupóstssamskipti sín við ráðherra og embættismenn vegna fjárfestingar Magma í HS Orku.

Eins og fréttastofa greindi frá í gær hlutaðist Össur Skarphéðinsson, utanríkisráðherra, til um kaup Magma Energy í HS Orku nokkuð eftir að hann hætti sem iðnaðarráðherra, þótt orku- og auðlindamál heyrðu ekki undir hann. Ásgeir Margeirsson, forstjóri Magma á Íslandi, bað einnig Katrínu Júlíusdóttur, iðnaðarráðherra, um frið fyrir Vinstri grænum í bréfi sem hann sendi á síðasta ári. Þá greindi fréttastofa frá ítarlegum tölvupóstsamskiptum Ásgeirs, sem þá var forstjóri Geysis Green, við ráðherra á embættismenn, sem voru á ansi vinalegum nótum og óskaði eftir hjálp þeirra við að „snúa ofan af vitleysunni" í andstæðingum fjárfestingar Magma á Íslandi og kvartaði meðal annars undan „suðið væri komið fram."

Var mikilvægt að fá pólitískt bakland fyrir þessum viðskiptum strax í byrjun? „Þetta snýst ekki um pólitískt bakland heldur snýst um það að aðilar máls hafa á öllum stigum kappkostað að upplýsa stjórnvöld um hvað væri í farvatninu svo það kæmi ekki stjórnvöldum á óvart ef einhver framþróun yrði í málinu. Þetta er fyrst og fremst kurteisi við stjórnvöld að upplýsa þau um hvað er í pípunum," segir Ásgeir Margeirsson.

Þú talaði um suð. Hvað áttu við með „suði" og hvers vegna sendirðu utanríkisráðherra tölvupóst? „Utanríkisráðherra var þá (júlí '09 innsk.blm) nýbúinn að láta af embætti iðnaðarráðherra og við vorum einfaldlega að lýsa skoðun á umræðum. Aðilar málsins hafa alla tíð unnið eftir lögum sem fólu í sér heimild einkaaðila og erlendra aðila á EES-svæðinu að fjárfesta í orkuvinnslu. Við urðum þess áskynja að ákveðnir aðilar væru ekki sáttir við það. (...) Orðið suð var notað um andmæli við þessum gjörningum sem voru í farveginum og voru í takti við lög og reglur," segir Ásgeir. Hann segist telja að baráttan gegn fjárfestingu Magma sé háð á röngum leikvelli, enda sé fyrst og fremst um skoðanaágreining að ræða um túlkun laga og reglna.

Ég hjó eftir orðalaginu, „sæll félagi Össur." Er þetta skírskotun í vináttu ykkar Össurar í stjórnmálum? „Ég er ekki virkur í stjórnmálum og hef aldrei verið. Ég hef hins vegar þekkt Össur lengi og maður á það til að ávarpa fólk sem maður þekkir kumpánlega. Og ég er bara stoltur af því." Ásgeir segist ekki leggja það í vana sinn að þéra fólk og hans samskipti við fólk sem hann þekki séu oftast á óformlegri nótum.

Sem stendur rannsakar nefnd forsætisráðherra kaup Magma á HS Orku. Nefndinni var ekki komið á fót með lögum og hún getur ekki ógilt kaupin. Sem stendur heldur Magma utan um 84 prósenta hlut í HS Orku og hefur gengið frá kaupum sem tryggir fyrirtækinu 98 prósenta hlut.

Þessi nefnd getur ekki ógilt kaupin og hún getur ekki tekið stjórnvaldsákvarðanir. Að því er virðist er hennar eina hlutverk að fjalla um málið. Hafa störf þessarar nefndar einhverja þýðingu fyrir ykkur og þessa fjárfestingu Magma? „Ég veit það ekki, ég held ekki. Ég get ekki vitað það," segir Ásgeir Margeirsson.