Innlent

Eigum ekki að óttast EFTA-dómstólinn

Þorbjörn Þórðarson skrifar
Stefán Már Stefánsson, prófessor við lagadeild Háskóla Íslands. Hann segir að íslensk stjórnvöld eigi ekki að vera hrædd við að leggja ágreining um skyldu vegna Icesave fyrir EFTA-dómstólinn.
Stefán Már Stefánsson, prófessor við lagadeild Háskóla Íslands. Hann segir að íslensk stjórnvöld eigi ekki að vera hrædd við að leggja ágreining um skyldu vegna Icesave fyrir EFTA-dómstólinn.

Lagaprófessor við Háskóla Íslands segir að íslensk stjórnvöld eigi ekki að óttast að láta EFTA-dómstólinn dæma í Icesave-málinu, en fjármálaráðherra segir að það yrði skelfileg niðurstaða af Íslendingar töpuðu málinu þar og vill frekar semja.

Steingrímur J. Sigfússon, fjármálaráðherra, sagði í fréttum okkar fyrir helgi að íslensk stjórnvöld hefðu engar ábendingar fengið á sínum tíma um að ekki hafi verið staðið rétt að innleiðingu tilskipunar Evrópusambandsins um innstæðutryggingar.

Sem stendur undirbúa íslensk stjórnvöld skriflegt svar við bréfi ESA, eftirlitsstofnunar EFTA, en stofnunin telur að íslenska ríkið beri lagalega ábyrgð á greiðslum til hollenskra og breskra sparifjáreigenda. Íslenska ríkið hefur frest fram í byrjun september til að svara áliti stofnunarinnar.)Ef ekkert samkomulag næst við Breta og Hollendinga og ESA fer málið fyrir EFTA-dómstólinn. Fjármálaráðherra sagði í fréttum okkar á föstudag aðspurður hvort það væri gott fyrir íslenska ríkið að fá ágreininginn um greiðsluskylduna leystan fyrir EFTA-dómstólnum: „Það væri allavega skelfilegt ef við töpuðum málinu og fengum á okkur samningsbrot dæmt og að öll skuldin væri gjaldfallin með öllum áföllnum kostnaði og við án nokkurra samninga um hvernig ætti að leysa úr því. (...) Ég er enn þeirrar skoðunar að besta leiðin út úr þessu sé með sanngjörnu samkomulagi," sagði Steingrímur.

Stefán Már Stefánsson, prófessor við lagadeild Háskóla Íslands, sagði í samtali við fréttastofu, aðspurður um ummæli fjármálaráðherra, að íslensk stjórnvöld ættu ekki að óttast að leggja ágreining um skyldu íslenska ríkisins fyrir EFTA-dómstólinn. Engin ástæða væri til að ætla að að dómstóllinn væri ekki hlutlaus til að skera úr um ágreininginn. Því hefði íslenska ríkið engu að tapa að fá dómstólinn til að skera úr um lagaskylduna. Stefán sagði að það væri sín skoðun að tilskipun Evrópusambandsins um innstæðutryggingar hefði verið innleidd réttilega hér á landi og að þar væri ekki getið um ríkisábyrgð á innstæðum.










Tengdar fréttir

Tekist á fram á síðustu stundu

Tekist var á um það fram á síðustu stundu innan Evrópusambandsins áður en formlegar aðildarviðræður hófust við Íslendinga, hvort hefja ætti viðræðurnar án þess að niðurstaða hefði fengist í Icesave-deilunni. Utanríkisráðherra segir Íslendinga eiga öfluga bandamenn innan sambandsins og ekki muni slitna upp úr viðræðunum vegna Icesave.

Skelfilegt að tapa fyrir EFTA-dómstól

Fjármálaráðherra segir að það yrði skelfileg staða ef Íslendingar töpuðu máli Eftirlitsstofnunar EFTA vegna Icesave fyrir EFTA-dómstólnum. Stjórnvöld vinna nú að svari til eftirlitsstofnunarinnar og vona að samningaviðræður um Icesave hefjist að nýju í næsta mánuði.

Stefnt að Icesave samningaviðræðum með haustinu

Samninganefndir Íslands, Bretlands og Hollands hittast í næstu viku til að ræða Icesave málið. Þetta hefur danski viðskiptavefurinn epn.dk eftir ónafngreindum heimildarmanni úr íslensku stjórnsýslunni. Heimildarmaðurinn segir að samningaviðræður muni standa yfir í ágúst og í byrjun september.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×