BÍ: Tillaga um að fresta ársfundi var felld

Aðalfundur Blaðamannafélags Íslands hófst klukkan átta en mikil átök hafa verið í félaginu síðustu daga. Svavar Halldórsson stjórnarmaður lagði fram tillögu þess efnis að aðalfundinum yrði frestað um þrjár viku. Taldi hann að lögmæti fundarins væri laskað, meðal annars vegna þeirra deilna sem uppi hafa verið um ársreikninga félagsins en meirihluti stjórnarinnar neitaði að undirrita reikningana fyrir ársfundinn.

Heimir Már Pétursson fréttamaður lagði fram frávísunartillögu við tillögu Svavars og var tillaga Heimis samþykkt. Fundurinn fer því fram samkvæmt dagskrá.

Í morgun tilkynnti Þóra Kristín Ásgeirsdóttir núverandi formaður félagsins að hún ætlaði ekki að bjóða sig fram til áframhaldandi formennsku og er Hjálmar Jónsson núverandi framkvæmdastjóri því einn í framboði til formanns.