Tilkynnt um fjögur innbrot eftir nóttina

Tilkynnt var um fjögur innbrot í morgun á höfuðborgarsvæðinu. Þjófar virðast hafa haft sérstakan augastað á Snælandsvídeó-keðjunni því brotist var inn í tvær sjoppur sem bera það nafn. Annað innbrotið var í Núpalind í Kópavogi en hitt í Hafnarfirði. Ekki liggur fyrir hvað þjófarnir höfðu upp úr krafsinu og er þeirra leitað.

Þá var brotist inn í íbúðarhúsnæði í Austurkór í Kópavogi nú í morgunsárið auk þess sem tilkynnt var um innbrot í bifreið í Reykási í Árbænum. Að sögn lögreglu liggur heldur ekki fyrir þar hverju var stolið og komust þjófarnir á brott.