Dagur: Geysilega sterkur hópur með breiða skírskotun

„Ég er mjög sáttur með niðurstöðuna en það er auðvitað ekki búið að telja allt þannig að innbyrðis röðun einstakra frambjóðenda getur breyst. Það er aftur á móti alveg ljóst að hópurinn er geysilega sterkur, með breiða skírskotun og kemur með mikilvæga reynslu víða úr samfélaginu inn í stjórnmálin. Það er endurnýjun á ferðinni," segir Dagur B. Eggertsson, varaformaður Samfylkingarinnar og oddviti flokksins í Reykjavík, um nýjustu tölur í prófkjöri flokksins vegna kosningarnar í vor.

Aðspurður um stöðu Sigrúnar Elsu Smáradóttur, borgarfulltrúa, segir Dagur  ótímabært að tjá sig um röðun einstakra frambjóðenda. Litlu muni og því geti röð þeirra breyst. Sigrún Elsa sóttist eftir öðru sæti en hún er enn sem komið er í sjöunda sæti.

Dagur er ánægður með þann stuðning sem hann fær prófkjörinu. „Ég er auðvitað mjög sáttur og þakka það traust sem mér er sýnt. Þetta er skýrt umboð til þess að ganga í það verkefni að leiða félagshyggju til valda í Reykjavík. Ég er afar sáttur við það og næsta mál frá mínum bæjardyrum séð er að taka upp þráðinn þar sem honum var sleppt eftir alltof stutta hundrað daga."