Öryrkja sem skuldar 117 milljónir synjað um greiðsluaðlögun

Hæstiréttur Íslands staðfesti synjun Héraðsdóms Reykjavíkur um tímabundna greiðsluaðlögun öryrkja sem hann hafði sótt um hjá Kaupþingi í september. Ástæðan fyrir því að maðurinn fékk ekki heimild til greiðsluaðlögunar var vegna þess að hann hagaði fjármálum sínum á ámælisverðan hátt.

Orðrétt segir í dómi Héraðsdóms Reykjavíkur:

„[...] af því að skuldari hafi hagað fjármálum sínum á verulega ámælisverðan hátt, hann tók fjárhagslega áhættu sem var í engu samræmi við greiðslugetu hans á þeim tíma sem til fjárskuldbindinganna var stofnað og hann hafi á þeim tíma verið með öllu ófær um að standa við þær."

Maðurinn skuldaði alls 117 milljónir. Þar af voru eftirstöðvar lána rúmlega 98 milljón krónur. Skuldir í vanskilum voru rúmlega 19 milljón krónur. Fasteign var metin á rúmlega 34 milljón krónur. Skuldir umfram eignir voru því um 83 milljón krónur.

Fasteignina keypti maðurinn á 39 milljónir árið 2006 en sama ár keypti hann bíl fyrir rétt rúmar fjórar milljónir króna. Hann tók lán fyrir báðum kaupunum og voru þau að stórum hluta í erlendri mynt. Það ár var maðurinn með samtals um 2,5 milljónir króna í örorkubætur og laun.

Þá segir í dómi héraðsdóms að maðurinn sé einstæður faðir sjö ára stúlku. Annað barn hans sé nýfætt en það búi ekki hjá honum. Þá eigi hann einnig tvö fósturbörn sem búi þó ekki hjá honum að staðaldri. Hann sé 75% öryrki eftir bílslys sem hann lenti í árið 1996.