Þrjár mannætur handteknar í Rússlandi

Þrjár rússneskar mannætur voru handteknar í dag samkvæmt BBC en þeir myrtu mann á dögunum og seldu líkamshlutana til Kebab skyndibitastaðar.

Mennirnir eru heimilislausir en að sögn lögreglunnar í Rússlandi þá myrtu þeir manninn, sem var 25 ára gamall, af persónulegum ástæðum sem ekki eru gefnar upp. Mennirnir voru handteknir í borginni Perm sem er í 1400 kílómetra fjarlægð frá Moskvu í dag.

Ekki er ljóst hvernig morðið bar að. Mennirnir virðast hafa ráðist á fórnalamb sitt vopnaðir hnífum og hamri. Þeir myrtu hann, átu hluta af kjötinu og seldu restina í Kebab-sjoppuna. Líkið fannst svo við samgöngumiðstöð í Perm.

Ekki er ljóst hvort kjötið hafi verið matreitt ofan í viðskiptavini Kebab staðarins.