Séra Gunnar snýr ekki aftur - fær vinnu á Biskupsstofu

Biskup Íslands hefur í dag flutt sr. Gunnar Björnsson úr embætti sóknarprests á Selfossi, í embætti sérþjónustuprests við Biskupsstofu. Ákvörðunin tekur gildi frá og með deginum í dag, 15. október 2009. Séra Óskar Hafsteinn Óskarsson mun gegna embætti sóknarprests á Selfossi þar til nýr prestur verður valinn.

Þetta kemur fram í tilkynningu frá Biskupsstofu.

Séra Gunnar var ákærður fyrir kynferðisbrot gegn tveimur stúlkum úr söfnuði sínum. Málið fór fyrir héraðsdóm og Hæstarétt þar sem hann var sýknaður. Þó var talið sannað að Gunnar hefði sýnt þá háttsemi sem ákært var fyrir, hún var hins vegar ekki talin falla undir kynferðislega áreitni né ósiðlegt athæfi. Gunnar hefur undanfarin tvö ár verið í leyfi frá störfum vegna málsins.