Bangsar fá svínaflensusprautu á laugardaginn

Öll börn geta komið með bangsana sína á Bangsaspítala Lýðheilsufélags læknanema næsta laugardag. Bangsaspítalinn verður á Hilton Reykjavík Nordica en þar verður jafnframt fagnað 100 ára afmæli Læknafélags Reykjavíkur.

„Við vorum að fá til landsins 10.000 skammta af bangsabóluefni gegn svínaflensu. Allir bangsar sem koma á Bangsaspítalann fá sprautu gegn flensunni!," segir Hrafnkell Stefánsson, yfirlæknir á Bangsaspítalanum.

Hrafnkell segir að ætlast sé til að börnin verði búin að ákveða sjúkdóm eða veikindi sem hrjá bangsan áður en þau mæta á Bangsaspítalann. Lang oftast sé um að ræða eitthvað sem börnin hafi kynnst sjálf eins og eyrnabólga eða ælupest eða eitthvað sem nákominn ættingi hafi verið með.

Hrafnkell segir að þegar börnin og bangsarnir komi á Bangsaspítalann taki svo Bangsalæknir á móti þeim. Hann spjalli við barnið, sem sé þá í hlutverki foreldris, um veikindi bangsans. „Við verðum með bangsaröntgentæki á staðnum og bangsinn fer í það ef okkur grunar að hann sé brotinn. Síðan fær hann viðeigandi meðferð, yfirleitt sáraumbúðir, plástra og góð ráð frá Bangsalækninum," segir Hrafnkell.

Að sögn Hrafnkels er tilgangurinn með bangsaspítalanum að kynna lækna og heilbrigðisstofnanir fyrir börnum í gegnum leik og leggja þannig grunn að jákvæðu viðhorfi og trausti gagnvart læknum og öðru heilbrigðisstarfsfólki. Ekki skipti minna máli að með þessu gefist læknanemum tækifæri til að þjálfa sig í samskiptum við börn og kynnast barnalæknisfræði.