Hraðamyndavélar settar upp á milli Hveragerðis og Selfoss

Á fimmtudaginn verða tvær hraðamyndavélar á Hringvegi milli Hveragerðis og Selfoss teknar í notkun. Jafnframt hefur verið bætt við nýrri hraðamyndavél í Hvalfjarðargöngum sem verður gangsett á sama tíma.

Fram kemur í tilkynningu frá Vegagerðinni að uppsetning vélanna sé liður í umferðaröryggisáætlun stjórnvalda og tilgangurinn með vélunum sé að draga úr ökuhraða á þjóðvegum og fækka umferðarslysum.

Um er að ræða stafræna myndatöku þar sem upplýsingar um hraðabrot eru sendar samstundis til lögreglunnar. Ekki er tekin mynd nema um brot sé að ræða.

Samgönguráðuneytið, Ríkislögreglustjóri, Umferðarstofa og Vegagerðin vinna að uppsetningu hraðamyndavélanna.