Sagður fullur að halda framhjá

Björgvin G. Sigurðsson þingmaður skrifar áhugaverða grein á bloggsíðu sína í dag þar sem hann veltir fyrir sér níð í skjóli nafnleysis. Björgvin veltir fyrir sér hver það sé sem beri ábyrgð á slíkum níð. Hann tekur nokkuð nýlegt dæmi sem snertir hans persónu en stofnaður var þráður á síðunni er.is fyrir skömmu þar sem því var logið blákalt upp á Björgvin að hann hefði verið drukkinn á skemmtistað og á kvennafari að auki. Semsagt; „fullur að halda framhjá," eins og hann orðar það.

Björgvin telur að sá sem haldi úti síðum þar sem nafnlaus óhróður og lygi eru borin á borð beri ábyrgðina. „Það eru þeir sem leggja rörið fyrir óþverrann og skrúfa frá."

Björgvin segir að þetta þurfi að skýra og lögunum að breyta. Einnig segir hann frá því að síðastliðinn vetur hafi því kerfisbundið verið logið upp á sig í gegnum net og tölvupósta að hann hefði fengið afskrifaðar skuldir í bönkum.

„Hrein lygi sem gekk svo langt að ég skrifaði um það grein í Moggann og hér á Pressuna til að bera af mér sakir og fékk minn viðskiptabanka til að votta sannleikann. En tilgangnum með rógnum var náð. Upp á mig stóð að bera af mér róginn eftir að hann hafði grafið undan mannorði mínu og trúverðugleika sem stjórnmálamanns og eitrað allt mitt líf."

Björgvin segir að framhjáhaldssagan hafi gengið svo langt að Séð og heyrt hafi farið í málið. Sagan var send á ristjórnina, listavel skrifuð að hans mati.

„Þá búið að barna söguna og tiltekinn staður nefndur og dróttað að skilnaði hins sex barna föðurs. Blaðið var svo vinsamlegt að senda mér afrit af rógburðinum og þá fyrst varð mér ljóst að um mig væri setið af dæmalausri hörku. Auðvitað leiðrétti ég lygina við blaðið og bað þá í öllum bænum að hafa samband við skemmtistaðinn og fá sannleikan staðfestann."

Björgvin segir svo í lok færslunnar að verði það niðurstaðan að það sé löglegt og siðlegt að fólk níðist nafnlaust og án ábyrgðar á fólki á netinu, skuli það allavega liggja fyrir hver beri ábyrgðina og hvert hana skal sækja þegar um ærumeiðingar er að ræða.

„Ekki verður hún sótt til nafnlausa hugleysingjans í það minnsta."



Bloggfærslan í heild sinni.