Er hægt að bjarga Íslandi?

Efnahagslíf Íslendinga er hrunið, erlend lántaka, verðbólga og áhættusækni „útrásarvíkinga“ hefur sett þjóðina á vonarvöl. Íslendingar geta hugsanlega bjargað sér með lögleiðingu marijuana.

Þetta er haft eftir Rob Cox, sem skrifar athyglisverða grein á Reuters um efnahag Íslands.

Samkvæmt greininni áætlar Seðlabanki Íslands að um 40% fjölskyldna séu með bílalán í erlendri mynt, auk þess sé meðal annars gríðarleg verðbólga í landinu og háir vextir.

Íslensku bankarnir tóku virkan þátt í leiknum, þeir endurlánuðu erlent lánsfé til svokallaðra frumkvöðla í íslensku viðskiptalífi sem reyndu eftir fremsta megni að halda uppi háu verði á hlutabréfamarkaði. Það var í raun allra hagur þar sem krosseignatengslin á íslenskum hlutabréfamarkaði voru gríðarleg.

Á hátindi hlutabréfaævintýrsins nam markaðsvirði félaga í íslensku Kauphöllinni yfir 250 faldri þjóðarframleiðslu Íslands, segir í greininni.

„Við urðum fórnarlömb okkar eigin velgengni,“ er haft eftir Þórði Friðjónssyni, forstjóra Kauphallarinnar.

Íslendingar búa yfir þeirri miklu náttúruauðlind, jarðhita, sem er nothæft til margvíslegs brúks. Meðal annars sér jarðhitinn um að hita gróðurhúsin sem gerir Íslendingum kleift að rækta grænmeti, blóm og jafnvel banana.

Lagt er til að Íslendingar nýti gróðurhúsin í öðrum tilgangi, ræktun marijuana. „Ef Íslendingar myndu lögleiða „gras“ myndi það auka ferðamannastraum til landsins og gott betur. Það myndi stytta innflutningsleið Bandaríkjamanna og Kanadabúa á marijuana um helming þar sem Amsterdam er helmingi lengra í burtu. Íhaldssömum ráðamönnum Íslands gæti þótt það of langt gengið en þarf ekki að leita allra leiða til að koma þjóðinni úr þeim skuldaklafa sem hún býr við?"

Grein Reuters má sjá hér