Óskar gagnrýndur af flokksbróður

Friðrik Jónsson, formaður Framsóknarflokksins á Akranesi og frambjóðandi um oddvitasæti flokksins í Norðvesturkjördæmi, gagnrýnir harðlega Óskar Bergsson, flokksbróður sinn og formann borgarráðs, fyrir að hafa sýnt dómgreindarskort vegna móttöku sem hann hélt fyrir framsóknarmenn í Ráðhúsinu og varðandi málefni Eyktar.

Óskar hefur sætt gagnrýni fyrir að hafa boðið rúmlega 30 flokksystkinum sínum í móttöku á kostnað borgarinnar í nóvember. Ólafur F. Magnússon, borgarfulltrúi F-listans, hefur farið fram á að upplýst verði hverjir þáðu boðið og hver kostnaður við móttökuna hafi verið. Hann hefur jafnframt spurt Óskar um tengls hans við verktakafyrirtækið Eykt og hvort hann hafi þegið beinar greiðslur frá félaginu eða öðrum fyrirtækjum í byggingariðnaði.

Í samtali við fréttastofu í gær sagðist Óskar ekki ætla að upplýsa hvaða einstaklingar eða fyrirtæki hafi styrkt sig í prófkjörsbaráttu Framsóknarflokksins 2006.

Dómgreindarskortur Óskars

Fréttir af móttökunni eru óheppilegar, að mati Friðriks. ,,Það má vel vera að hún hafi verið innan "réttar" hans embættis að fá hana kostaða af borginni, en það var dómgreindarskortur engu að síður, sérstaklega þar sem hér var víst bara um móttöku fyrir framsóknarmenn í sveitarstjórnum að ræða," segir Friðrik í pistli á heimasíðu sinni.

Ófullnægjandi svör um Eykt

Jafnframt segir Friðrik að svar Óskars við því hvort hann hafi fengið stuðning frá Eykt sé ekki fullnægjandi. Óskari sé í lófa lagið að lýsa því jafnframt yfir að þau fjárframlög sem hann hefi þegið í kosningasjóði hafi verið án skuldbindinga.

Skrif Friðriks Jónssonar er hægt að lesa hér.