Þúsundir skora á Þorgerði

„Þetta er frábært. Ótrúlegur fjöldi. Undirskriftasöfnunin fór af stað fyrir rétt rúmri viku,“ segir Sigríður Margrét Oddsdóttir framkvæmdastjóri Skjás eins.

Þegar þetta er skrifað hafa tæp 34.500 skráð sig á undirskrifalista þar sem skorað er á Þorgerði Katrínu Gunnarsdóttur menntamálaráðherra að leiðrétta skakka samkeppnisstöðu á auglýsingamarkaði vegna stöðu Ríkissjónvarpsins þar. Er þetta líklega stærsta marktæka undirsskriftarsöfnun sem fram hefur farið á Netinu til þessa en gefa þarf upp kennitölu til að koma í veg fyrir misnotkun.

„Á hverju ári fær RÚV þrjú þúsund milljónir króna í forskot frá okkur skattgreiðendum og getur því notað þann pening til að yfirbjóða aðrar stöðvar við kaup á efni,“ segir í áskoruninni sem er afgerandi. Sigríður Margrét er ánægð með viðbrögðin en segir fjöldann í sjálfu sér ekki koma á óvart þegar litið er til þess að 80 prósent Íslendinga á aldrinum 12 til 80 ára horfa á Skjá einn í hverri viku. „Skjár einn veitir ókeypis afþreyingu sem skiptir afskaplega miklu málin í því umhverfi sem við búum í núna.“

Framkvæmdastjórinn er með tvö mál á sínu borði sem skipta sköpum um hvort Skjár einn lifir eða deyr. Annað eru endursamningar við erlenda birgja – hitt er hvort Þorgerður Katrín sjái ljósið að sögn Sigríðar. „Nú bíðum við þess að samkeppniseftirlitið veiti ráðherra álit. Þá segist Þorgerður hafa sett upp starfshóp sem á að skila af sér áliti um stöðu RÚV á auglýsingamarkaði. Þegar sú niðurstaða er fyrirliggjandi við afhenda undirskriftarlistana í þeirri von að Þorgerður taki rétta ákvörðun.“ Aðspurð hvort álit starfshópursins sé ekki „að setja í nefnd dæmi“ og út úr því muni aldrei koma neitt segst Sigríður Margrét ekki trúa því. Þetta mál hljóti að fá hraða afgreiðslu. „Annað væri ekki sanngjarnt gagnvart fólki sem hefur fengið uppsagnarbréf.“

- jbg