Ökumaður kranabíls á gjörgæslu eftir líkamsárás

Ökumaður kranabíls liggur á gjörgæsludeild Landspítalans eftir að eigandi bíls, sem hann var að fjarlægja að ósk lögreglu í Keflavík í gærkvöldi, sló hann þungu höggi í andlitið.

Við það missti hann meðvitund og var fyrst fluttur á heilsugæslustöðina í Keflavík, en þaðan á slysadeild Landsspítalans. Þar var hann vistaður á gjörgæslu og hefur smám saman verið að komast til meðvitundar í nótt. Hann verður væntanlega fluttur á almenna deild í dag.

Árásarmaðurinn var handtekinn, en sleppt að loknum yfirheyrslum. Hann á yfir höfði sér háar sektir og jafnvel ákæru.