Grænlendingar veiða bandaríska fjárfesta

Í nýlegum leiðara stórblaðsins The Times er fjallað um að Grænland kunni þegar fram líða stundir að vega þungt í heimshagkerfinu og þeirri spurningu velt upp hvort landið, fái það sjálfstæði, halli sér fremur að Evrópu eða Bandaríkjunum.

Tilefni þessara vangaveltna er nýleg ferð forsvarsmanna Greenland Venture, fjárfestingarfélags grænlensku heimastjórnarinnar, til fundar við fjárfesta í Bandaríkjunum.

Í danska blaðinu Berlingske Tidende er fjallað um breytingar í Grænlandi og bent á að í nóvember verði þar í landi kosið um sjálfstæði. Vinna við að gera Grænland minna háð Danmörku sé hins vegar löngu hafin.

Í Bandaríkjunum var mestu púðri eytt í að kynna ferðamanna- og hótelverkefni undir heitinu Igloo Mountain Resort, en um leið er leitað félaga til samstarfs í margvíslegum iðnaði. Nýjustu fregnir herma til dæmis að auknar líkur séu á að Alcoa byggi risa­álver í Maniitsoq í Grænlandi.

Að auki sjá Grænlendingar tækifæri í hlýnun jarðar því með bráðnun jökla vænkast hagur þeirra sem kunna að vinna þar úr jörðu olíu og gas, auk verðmætra málma á borð við gull, platínu, demanta, blý, sink og kol.

Magnús Tumi Guðmundsson, prófessor í jarðeðlisfræði við eðlisfræðiskor raunvísindadeildar Háskola Íslands, segir Grænland og Ísland ólík hvað varðar tækifæri tengd hlýnun jarðar. „Á Grænlandi er berg sem er frá því að vera sextíu milljóna ára gamalt hérna næst okkur upp í að vera fjögurra milljarða ára gamalt. Þvess vegna eru allar líkur á að töluvert sé af málmum og slíku í Grænlandi. Og eftir því sem jökulinn leysir og hann minnkar batna aðstæður við námavinnsluna. En hér búum við í mjög ungu landi og því nánast útilokað að í landgrunni Íslands geti til dæmis fundist olía í því magni að skipti nokkru einasta máli,“ segir hann.