Varð fyrir fólskulegri árás í Laugarneshverfi

„Það er óhugnalegt að svona nokkuð geti átt sér stað svo nálægt heimili manns," segir Unnur María Birgisdóttir en kærasti hennar, 24 ára karlmaður, varð fyrir fólskulegri árás þar sem hann var á heimleið úr miðborg Reykjavíkur í morgun.

Árásin varð á Horni Sundlaugarvegs og Borgartúns í morgun. Kærasti Unnar var á heimleið úr miðbænum ásamt félaga sínum. Þar mættu þeir tveim mönnum. Kærastinn og félagi hans veittu mönnunum enga sérstaka eftirtekt en skyndilega sló annar maðurinn kærastan bylmingshöggi með þeim afleiðingum að hann féll vankaður í jörðina. Við höggið hlaut hann opið beinbrot á nefi auk þess sem nokkar tennur úr honum brotnuðu.

Félagi kærastans hljóp á brott til að sækja aðstoð og náði hann að hringja á lögreglu. Áður en hún kom á staðinn gaf árásarmaðurinn sér tíma til að standa yfir fórnarlambi sínu og ausa yfir hann svívirðingum á tungumáli sem fórnarlambið skildi ekki.

Á meðan þessu stóð stöðvaði bíll við gangstéttina. Bílstjórinn spurði hvort ekki væri allt í lagi, hvort mennirnir þörfnuðust ekki aðstoðar. Árásarmaðurinn svaraði þá á ensku og sagði bílstjóranum að aka áfram því engrar aðstoðar væri þörf. Skömmu síðar hvarf árásarmaðurinn á brott ásamt félaga sínum.

Meiðsli kærasta Unnar eru það alvarleg að hann þarf á morgun að gangast undir uppskurð til þess að rétta nef hans. Því næst þarf hann að setjast í tannlæknastól og láta gera við skemmdir á tönnum sínum.

En mesti skaðinn er ekki endilega líkamlegur.

„Við erum bæði í sjokki," segir Unnur María. „Ég held að við þurfum bæði að leita okkur áfallahjálpar eftir þetta. Það sem gerir þetta sérstaklega erfitt er tilhugsunin um að þetta gerist í hverfinu okkar. Ekki í miðborginni þar sem okkur er kennt að ýmislegt getir gerst heldur örstutt frá þar sem við búum."

Lögregla hefur ekki vitneskju um hver var þarna að verki og eru því allir sem upplýsingar um málið geta gefið, og þá sérstaklega ökumaðurinn sem stöðvaði bifreið sína og bauð árásarmanninum aðstoð sína, beðnir um að hafa samband við hana í síma 444-1000.