Á tvöföldum hámarkshraða

Lögreglumál Fimm ökumenn voru teknir á tvöföldum leyfilegum hámarkshraða í íbúagötu í Breiðholti um helgina.

Leyfilegur hámarkshraði í götunni er 30 kílómetrar á klukkustund. Að sögn lögreglunnar mældust bílarnir á bilinu 60 til 70 kílómetra hraða. Þeir sem mældust á bilinu 56 til 60 kílómetra hraða þurfa að greiða 25 þúsund krónur í sekt.

Þeir sem mældust á bilinu 61 til 65 kílómetra hraða fá hins vegar 45 þúsund króna sekt og eru sviptir ökuleyfi í þrjá mánuði. Það er því talsverður munur á því hvort ökumenn mælist á 60 kílómetra hraða eða á 61 kílómetra hraða.

Alls voru tæplega sextíu ökumenn teknir um helgina fyrir of hraðan akstur á höfuðborgarsvæðinu. Sá sem hraðast ók var maður á fertugsaldri sem var tekinn á 153 kílómetra hraða sunnan Hafnarfjarðar. Hann má búast við að missa ökuleyfið og borga yfir hundrað þúsund krónur í sekt.

Þá var sautján ára ökumaður stöðvaður í Garðabæ á 143 kílómetra hraða. Fær hann háa sekt og missir jafnvel ökuréttindin.