Drulludallurinn kominn útældur til hafnar

Skemmtiferðaskip með nærri 700 fárveika farþega og starfsfólk lagði að bryggju í Flórída í gærkvöldi, eftir vægast sagt eftirminnilega ferð, þó hún hafi varla verið nein skemmtiferð. Á 16 daga ferð yfir Atlantshafið kvörtuðu 530 farþegar og 140 af starfsfólkinu undan niðurgangi og ælupest, hrjáðir af sömu noro-veirunni og hefur gert mörgum Íslendingum lífið leitt undanfarnar vikur.

Veirusýkingin er afar smitandi en nokkrir farþeganna höfðu nælt sér í pest rétt áður en lagt var úr höfn í Róm og hún smitaðist svo milli fólks á skipinu, sem tekur nærri 3000 farþega. Flestir farþeganna voru glaðir að vera sloppnir af skipinu enda hefur sjóveikin varla lífgað upp á ástandið ofan á allt saman.