Andstaða við að ríkið taki við lífeyrisskuldbindingum RÚV

Engar ákvarðanir hafa verið teknar af hálfu stjórnvalda um yfirtöku lífeyrisskuldbindinga Ríkisútvarpsins til að létta á gríðarlegum skuldum þess, eins og stjórnendur þess leggja til. Menntamálaráðherra segir ekki óeðlilegt að rekstur Ríkisútvarpsins taki breytingum í takt við tækninýjungar.

Skuldavandi Ríkisútvarpsins er gríðarlegur og til að mæta honum hafa stjórnendur Ríkisútvarpsins m.a. ákveðið að selja stóra lóð við hliðina á útvarpshúsinu. En það eitt dugar ekki til. Rætt hefur verið að ríkið yfirtaki lífeyrisskuldbindingar Ríkisútvarpsins ohf. en um það er menn ekki á eitt sáttir í stjórnarliðinu.

Menntamálaráðherra hefur ákveðið að leggja fram frumvarp í haust sem afturkallar fyrirhugaða lækkun á útvarpsgjaldinu á almenning, til að mæta skuldavandanum. En í fjárlaganefnd er mikil andstaða meðal stjórnarflokkanna við tillögu stjórnar Ríkisútvarpsins um að ríkið yfirtaki einnig milljarða lífeyrisskuldbindingu stofnunarinnar.

„En ef þessar hugmyndir myndu ganga eftir væri þetta bæði hækkun á útvarpsgjaldinu til stofnunarinnar og síðan ansi groddaleg eingreiðsla upp á fjögur þúsund milljónir króna,“ sagði Guðlaugur Þór Þórðarson varaformaður fjárlaganefndar í hádegisfréttum Bylgjunnar.

Illugi Gunnarsson menntamálaráðherra segir það gera málið enn erfiðara að það sé töluverð skuldasöfnun hjá Ríkisútvarpinu umfram lífeyrisskuldbindingarnar. Þetta verði allt að skoða í samhengi við eignir.

„Ég hef ekki viljað taka neina afstöðu strax til þessa máls. Þetta er mál, eins og réttilega hefur verið bent á, getur haft fordæmisgildi. Það þarf þá að vega og meta hvaða eignir eru þarna inni í ohf-inu. Þetta er mál sem snertir auðvitað mjög fjármálaráðuneytið og fjármálaráðherra og svo framvegis. Þannig að þetta er ekki eitthvað sem verið er að ákveða þessa dagana,“ segir Illugi.

Menntamálaráðherra segir að stjórnvöld hafi nýlega sett á laggirnar nefnd undir forystu Eyþórs Arnalds sem eigi að skoða allan rekstur Ríkisútvarpsins ohf. frá stofnun félagsins og greina vandann. Ekki óeðlilegt að Ríkisútvarpið taki breytingum eins og aðrir fjölmiðlar í ljósi tækniþróunar. Staða Ríkisútvarpsins sé hins vegar alvarleg.

„En mér finnst auðvitað ekki gott að það sé bara gert út frá því að menn eru komnir í slíkar heljarstöðu með reksturinn að það einhvern veginn eitt og sér valdi breytingunum,“ segir menntamálaráðherra.

Þá þurfi að huga að samkeppnisstöðu Ríkisútvarpsins gagnvart öðrum fjölmiðlum ef rekstur þess verði styrktur.

„Að sjálfsögðu er auðvitað alveg eðlilegt að alltaf sé spurt að því á hverjum tíma hver samkeppnisstaðan sé. Hvort það sé verið að gera öðrum fjölmiðlum erfitt um vik. Þetta er allt gömul umræða og ný,“ segir Illugi Gunnarsson menntamálaráðherra.