Andri: Okkur fannst allavega gaman í þessu afmæli

Andri Ólafsson, fyrirliði ÍBV, var að sjálfsögðu kátur eftir 1-0 sigur á Val á Vodafonevellinum í kvöld. Eyjamenn spiluðu manni færri allan seinni hálfleikinn en tókst að tryggja sér 1-0 sigur með marki Þórarins Inga Valdimarssonar í uppbótartíma.

„Ég er hrikalega stoltur af liðinu. Við lentum manni færri og unnum fyrir þessum sigri, það er klárt. „Við féllum aftarlega í seinni hálfleik og fengum fáar sóknir en svo var svolítil heppni með okkur að setja hann í vinkilinn í lokin. Mér fannst þeir ekkert eiga þetta skilið," sagði Andri sem gat ekkert sagt til um rauða spjaldið sem Tryggvi Guðmundsson fékk á 45.mínútu.

„Það er alltaf erfitt að fá rautt hérna en við fengum líka rautt spjald hérna í fyrra. Ég sá þetta ekki og get því ekki dæmt um þetta. það voru nokkur atriði í leiknum sem voru vafasöm en Kiddi var annars bara fínn," sagði Andri en hann segir að hálfleiksræða Heimis Hallgrímssonar hafi haft mikið að segja í kvöld.

„Það var gargað á okkur í fimmtán mínútur í hálfleik. Heimir var ekki sáttur með vinnuframlagið eða að við héldum boltanum illa. Menn lögðu sig því fram þótt að það hafi ekki verið mikið spil hjá okkur," sagði Andri.

„Það var ótrúlegt að ná að klára leikinn með svona marki en það var bara eitthvað með okkur í dag. Okkur var boðið í afmæli og maður mætir bara í afmælið. Það á að vera gaman í afmæli og okkur fannst allavega gaman í þessu afmæli," sagði Andri að lokum.