Allt undir við fjárlagagerðina

Það er allt undir núna þegar verið er að skoða fjárlögin, segir Guðbjartur Hannesson, formaður fjárlaganefndar, aðspurður út í afstöðu Kirkjuþings til 9% niðurskurðarkröfu á Þjóðkirkjuna.

Kirkjuþing samþykkir ekki niðurskurðarkröfuna en samþykkir 5% niðurskurð með skilyrðum um að sóknargjöld á hvert sóknarbarn haldist óbreytt, samkvæmt ályktun sem Kirkjuþingið samþykkti í gær. Bendir Kirkjan á að ríkisvaldið geti ekki tekið einhliða ákvörðun um niðurskurð á fjárframlögum til Kirkjunnar samkvæmt samkomulagi sem gert var fyrir hartnær fimmtán árum.

Guðbjartur segir að ályktun Kirkjuþings hafi komið sér á óvart. „Við höfum litið þannig á að það væri allt undir núna þegar að við erum að fara yfir fjárlögin. Þess vegna hafi Kirkjan tekið sama niðurskurði og stofnanir almennt. Auðvitað verður að fara yfir þetta þar sem hafa verið gildandi samningar eða vikið er frá þeim," segir Guðbjartur. Hann tekur fram að vegna fjárlagahallans sé víða verið að víkja frá samningum sem gerðir hafa verið .

Guðbjartur segir að verið sé að vinna fjárlagafrumvarp fyrir næsta ár í fjármálaráðuneytinu en fjárlaganefnd taki síðan við því fljótlega eftir að þing kemur saman í haust.