Algjör sprenging á fjölda nýnema í tölvunarfræði

Mikil eftirspurn er eftir tölvunarfræðingum og forriturum í atvinnulífinu. Að mati fagfólks hefur háskólasamfélagið ekki svarað kalli um hagnýta þekkingu í forritun en þetta er að breytast. Sprenging hefur orðið í fjölda nýnema í tölvunarfræði á háskólastigi.

Algjör sprenging á fjölda nýnema í tölvunarfræði sem kennd er á háskólastigi í bæði Háskóla Íslands og Háskólanum í Reykjavík. Nýnemum í tölvunarfræði við HR fjölgað jafnt og þétt sl. fimm ár. Í ár voru þrefalt fleiri nýskráningar en fyrir fimm árum og hófu 443 nemendur nám við deildina í haust.

„Það hefur verið mikið ákall um fjölgun í iðnaðinum og við höfum verið að gera mjög mikið til þess að reyna að auka áhuga ungs fólks á því að fara í þetta fag, tækninám almennt og upplýsingatækni,“ segir Björn Þór Jónsson, deildarforseti tölvunarfræðideildar Háskólans í Reykjavík.

Starfsfólk í upplýsingatæknigeiranum segir að háskólasamfélagið hafi ekki í nægilega ríkum mæli svarað kalli atvinnulífsins með áherslu á forritun, þ.e verklegri þekkingu.

Ragnheiður Magnúsdóttir stýrir Hugsmiðjunni en hún hefur mikla reynslu úr upplýsingatækni. Það er forvitnilegt fyrir þá sem eru að horfa á þessa frétt í gegnum ADSL sjónvarp að hún stýrði einmitt uppbyggingu þess kerfis fyrir Símann. Það var tveggja milljarða króna verkefni.

„Hingað til hefur verið svolítið mikið um það í bransanum að fólk er ekki með á hreinu að námið þarf að fylgja því sem er að gerast. Við erum í rauninni að ýta á háskólann, tækniskólann og jafnvel listaháskólann að setja meiri kröfur hvað varðar vefgreinarnar,“ segir Ragnheiður.

Björn Þór Jónsson segir að þetta sé að breytast. Markmiðið sé að útskrifa fagfólk sem geti gengið beint í störf í þeirri tækni sem sé ráðandi hverju sinni.

Mikil eftirspurn er eftir fólki með tækni- og vísindabakgrunn. Síðast í gær sögðum við frá því að 200 vísindastörf myndu skapst við Hátæknisetur Alvogen í Vatnsmýri. Fólk með þennan bakgrunn getur unnið hvar sem er og því þarf að gera það eftirsóknarvert fyrir það að starfa á Íslandi.