Innlent

„Grútspældur með að fá svona skoðanakönnun“

Stefán Rafn Sigurbjörnsson skrifar
Benedikt er ekki sáttur með fylgi flokks síns.
Benedikt er ekki sáttur með fylgi flokks síns. mynd/Vilhelm
Benedikt Jóhannesson, fjármálaráðherra og formaður Viðreisnar, segir að Viðreisn hafi ekki náð að vera nægilega sýnileg með þau stefnumál sem flokkurinn vinnur að í ríkisstjórn. Viðreisn hrapar í nýrri skoðanakönnun Fréttablaðsins, Stöðvar tvö og Bylgjunnar sem birt var í morgun.

Sjá: „Gjörbreytt staða frá síðustu kosningum“

Viðreisn mælist með 3,1 prósent fylgi en fékk 10,5 prósent í síðustu Alþingiskosningum. Sömuleiðis dalar Björt Framtíð og mælist með 3,8 prósent en fékk 7,2 prósent í þingkosningunum. Þriðji stjórnarflokkurinn, Sjálfstæðisflokkurinn, stendur óhaggaður sem bautasteinn og bætir meira að segja við sig rúmum þremur prósentustigum frá kosningum og mælist með 32,1 prósent.

Sjá: „Sjálfstæðisflokkurinn hákarl íslenskra stjórnmála“

Viðreisn og Björt framtíð eru samanlagt með ellefu þingmenn og myndu þeir allir falla út af þingi yrði þetta raunin. 

„Ég verð nú að vera alveg hreinskilinn með það að maður er grútspældur með það að fá svona skoðanakönnun,“ segir Benedikt. „Mér finnst það benda til þess að við séum ekki nógu góð í að kynna það góða starf sem við erum að undirbúa,.“

Benedikt segir að ráðherrar Viðreisnar vinni hörðum höndum við að gera kosningastefnu flokksins að veruleika. Nefnir hann í því samhengi jafnlaunavottun, gagnsæi í ríkisfjármálum, breytingar á landbúnaðarkerfinu, húsnæðismálafrumvarp og breytingu á peningastefnunni.

„Vissulega voru gerðar miklar væntingar til okkar og fólk hefur gjarnan viljað sjá þessar breytingar verða sem allra fyrst og ég skil það vel. Við þurfum kannski aðeins að taka okkur á og vera minna að vinna inn á við og kynna verk okkar betur út á við,“ segir hann, „Margt af þessu á eftir að koma í ljós og gerir það á næstu vikum, sumt á næstu mánuðum.“




Fleiri fréttir

Sjá meira


×