Innlent

Yfir sex þúsund manns hafa sótt íslenskt kynlífsmyndband: „Ég bað hann um að hætta“

Stefán Árni Pálsson skrifar
Konan hefur kært hann til lögreglu og gæti hann átt yfir höfði sér fangelsisdóm.
Konan hefur kært hann til lögreglu og gæti hann átt yfir höfði sér fangelsisdóm. myndir/skjáskot af vefnum ruv.is
„Þetta var rosalega gróft vídeó,“ segir íslensk kona sem hefur orðið fyrir barðinu á hefndarklámi.

Yfir sex þúsund manns hafa sótt og skoðað kynlífsmyndband á netinu en á myndbandinu má sjá konuna og fyrrverandi kærasta hennar. Þetta kom fram í Kastljósinu í kvöld en konan var í viðtali í þættinum.

„Það sést í andlitið á mér, allan líkamann á mér. Það sést allt. Hann tók myndbandið upp og hann heldur á myndavélinni,“ segir konan en maðurinn fékk hugmyndina af því að taka kynlífið upp á myndband.

„Já, þetta var gert með mínu samþykki en ég bað hann um að hætta. Mér fannst þetta óþægilegt en ég hélt að hann myndi eyða því.“

Maðurinn setti myndbandið á netið í hefndarskyni meðal annars af því hún vildi ekki hefja samband við hann að nýju. Konan hefur kært hann til lögreglu og gæti hann átt yfir höfði sér fangelsisdóm, verði hann fundinn sekur.

Engin leið er að stöðva útbreiðslu myndbandsins sem er nú þegar komið á erlendar klámsíður.

„Ég veit ekkert hvað hefur orðið um þetta myndband en eins og ég ímynda mér þá er það útum allt. Hann nafngreindi mig á vídeóinu, hann setti það á netið og skrifaði fullt nafn mitt undir.“




Fleiri fréttir

Sjá meira


×