Verzlingarnir sextán fá að snúa aftur

Sextán nemendur Verzlunarskóla Íslands, sem var tímabundið vísað frá vegna drykkju í húsakynnum skólans, fá að halda áfram námi sínu. Þetta staðfestir Ingi Ólafsson skólameistari í samtali við Vísi.

„Já, þeir fá að halda áfram. Öll dýrin í skóginum eru vinir núna,“ segir hann. Ingi segir að gert hafi verið samkomulag við hvern og einn nemanda en hann vill ekki fara nákvæmlega í hverju það felist.

„Þeir átta sig alveg á mistökunum sínum,“ útskýrir hann enn fremur.

Í síðustu viku sagði Vísir frá því að sextán piltum á fjórða ári í Verzlunarskólanum hafði verið vísað úr skólanum eftir að hafa neytt áfengis í kjallara skólans, áður en þeir héldu í Leifsstöð þar sem þeir áttu flug til Ítalíu í námsferð sem tengdist listfræðinámi þeirra.

Ingi skólameistari sagði þá í samtali við Vísi að hann ætlaði að funda með nemendunum og gefa þeim kost á því að útskýra hvers vegna þeir ættu að fá að ljúka námi sínu við skólann. Í fyrstu frétt Vísis af málinu kom fram að afar strangar reglur séu um neyslu vímuefna í skólanum:

„Notkun tóbaks (reyktóbak, neftóbak og munntóbak) er stranglega bönnuð í húsakynnum skólans og á lóð hans.

Stranglega er bannað að hafa um hönd áfengi og önnur vímuefni eða vera undir áhrifum þeirra í húsnæði skólans og á lóð hans. Neysla áfengis og annarra vímuefna er bönnuð á öllum samkomum og ferðalögum sem eru í nafni skólans,“ segir í reglum Verzlunaskólans.