Van Gaal: Shaw gæti komið fyrr til baka

Loui van Gaal, knattspyrnustjóri Manchester United, segir að endurkoma Luke Shaw gangi vel en hann fótbrotnaði mjög illa í leik gegn PSG í Meistaradeild Evrópu í september á síðasta ári.

Upphaflega var talið að tímabilið væri búið fyrir Shaw og hann myndi ekki leika meira en Van Gaal hefur ekki lokað fyrir það að sjá hann á vellinum á þessu tímabili.

„Shaw er nýkominn úr læknisskoðun og þetta lítur bara mjög vel út,“ sagði Van Gaal í samtali við MUTV.

„Þetta er að gróa vel saman og hann gæti komið til baka fyrr en áætlað var. Hann þarf samt sinn tíma og við verðum bara að gefa honum hann,“ sagði Van Gaal.

Það hefur gengið erfilega fyrir United að leysa stöðu vinstri bakvarðar eftir að Shaw meiddist. Nú er Marcos Rojo meiddur og því er þessi staða nokkuð stórt vandamál fyrir liðið.