Utanlandsferðin kostaði árslaun verkamanns

Fulltrúar almennings í stjórn Orkuveitunnar láta sér ekki nægja rútuferðir upp á Hellisheiði til að kynna sér jarðhitasvæði og fleira heldur ferðast til landa hinumegin á hnettinum. Kostnaðartölur síðustu tveggja ára, sem DV greinir frá í dag, og Stöð 2 fékk einnig frá Orkuveitunni, eru jafnframt fyrir ferðir á vegum dótturfélagsins REI.

Stjórnarformaður Orkuveitunnar, Guðlaugur Sverrisson, fór þó bara til Oslóar og Stokkhólms fyrir 160 þúsund krónur en bætti um betur með Japansreisu og Lundúnaför sem kostuðu samtals rúmlega eina milljón króna.

Kjartan Magnússon heimsótti bæði Asíu og Afríku, flaug til Jemen á Arabíuskaganum og síðan yfir Rauðahafið til Djíbútí og Eþíópíu. Reikningurinn 840 þúsund krónur. Svo heimsótti hann bæði Ameríku og Austur-Evrópu, fór til Kaliforníu og Slóvakíu fyrir 700 þúsund krónur.

Ásta Þorleifsdóttir fór með Kjartani til Jemen, Djíbútí og Eþíópíu. Reikningurinn vegna Ástu var nærri 1,1 milljón króna, 250 þúsund krónum hærri en kostnaðurinn vegna Kjartans, sem Ásta segir að hljóti að vera bókhaldsvilla. Hún fór líka til Austur-Evrópu, til Búdapest, en sú för kostaði 260 þúsund krónur.

Ekkert toppar þó Afríku- og Asíuför Sigrúnar Elsu Smáradóttur en hún fór til Filippseyja, Indónesíu og Djíbútí að kynna sér virkjanasvæði. Reikningurinn 1.695 þúsund krónur, sem þá voru árslaun verkamanns, samkvæmt launatöxtum. Sigrún Elsa fór líka á fund til Kaliforníu fyrir 465 þúsund krónur. DV hefur eftir henni í dag að ferðirnar hafi verið gagnlegar og peningunum vel varið.