Tvö banaslys rakin til farsímanotkunar á Íslandi síðan 1998

Aðeins má rekja sex umferðaslys á höfuðborgarsvæðinu beint til farsímanotkunar síðan í byrjun árs 2010 til dagsins í dag. Á sama tímabili má rekja 16 umferðaróhöpp til farsímanotkunar  en þar urðu engin slys á fólki. Þetta kemur fram í skýrslu sem Lögreglan á höfuðborgarsvæðinu gerði fyrir fréttastofu Vísis.

Ómar Smári Ármannsson aðstoðaryfirlögregluþjónn bendir á að þessar upplýsingar eru unnar úr þeim tilvikum þar sem tilkynnt var sérstaklega að athygli ökumanns hefði beinst að farsíma áður en slysið varð.

„Fólk er oftast ekki spurt að hverju athygli þeirra beindist áður en slysið átti sér stað og fæstir tilkynna lögreglu að þeir hafi verið í símanum ef svo var,“ segir Ómar Smári og telur því að þessar tölur gefi ekki rétta mynd af stöðunni.

Skráð eru um 400 umferðaslys á ári á höfuðborgarsvæðinu að meðaltali síðan 2010. Um 600 ökumenn að meðaltali eru sektaðir af lögreglu fyrir farsímanotkun bakvið stýri án handfrjálsrar búnaðar á ári hverju. Í dag er sektin 5000 kr. en sektarreglugerðin er í endurskoðun og búast má við því að hún verði hækkuð gífurlega innan skamms.

Ekki algeng orsök banaslysa

Rannsóknarnefnd samgönguslysa hefur aðeins náð að rekja 2 banaslys á Íslandi til notkunar farsíma frá árinu 1998. Tekið er fram að oft getur reynst erfitt að skera úr um hvort slys megi rekja til farsímanotkunar þegar kemur að banaslysum. Þegar grunur liggur á að svo sé eru símaskýrslur viðkomandi ökumanns skoðaðar.

„Þetta er ekki algeng orsök banaslysa í umferðinni,“ segir Ágúst Mogensen hjá Rannsóknarnefnd Samgönguslysa sem hefur síðastliðin ár rannsakað banaslys í umferðinni á landsvísu. „Okkur grunar nú að það séu fleiri slys sem minni meiðsl verða þar sem fólk er annað hvort að tala í síma eða hefur verið á einhvers konar samskiptamiðlum í símanum sínum þegar slysið varð en svo bara ekki gefið upp.“

Fyrir nokkrum árum framkvæmdi nefndin rannsókn á útafakstri og þar kom í ljós að rekja mætti óhöpp til farsímanotkunar.

„Við höfum vissulega áhyggjur af þessu því við vitum að viðbragðstími lengist til muna þegar fólk er að nota símana sína. Fólk er að líta af veginum í nokkrar sekúndur í senn og fara jafnvel tugi metra á meðan.“