Tónleikar til styrktar hljóðmeistara

Efnt verður til stórtónleika í Þjóðleikhúsinu annað kvöld til styrktar Halldóri Snæ Bjarnasyni og fjölskyldu hans. Halldór Snær er 38 ára gamall fjölskyldumaður og hljóðmeistari Þjóðleikhússins, en þar hefur hann starfað á annan áratug.

Fyrir nokkrum árum greindist hann með krabbamein í eitlum og blóðmerg en eftir erfiða krabbameinsmeðferð lagðist meinið í dvala. Í haust greindist Halldór Snær aftur og nú með fjórða stigs ólæknandi krabbamein.

Samstarfsfólk Halldórs Snæs ákvað að taka höndum saman og leggja honum og fjölskyldu hans lið. „Okkur langaði til þess að styðja við hann og fjölskyldu hans og ákváðum að efna til þessara tónleika,“ segir Sigurlaug Þorsteinsdóttir, markaðs- og kynningarstjóri Þjóðleikhússins.

Margir landsþekktir tónlistar- og listamenn koma fram á tónleikunum og fjölmargir hafa lýst yfir áhuga sínum á því að koma fram. „Það bætist stöðugt í listann af þeim sem ætla að taka þátt.“

Á meðal þeirra sem koma fram eru Todmobile, Moses Hightower, Hellvar, Skúli Mennski, Ari Eldjárn, dj. flugvél og geimskip, Ólafía Hrönn Jónsdóttir, Sigríður Thorlacius, Heimilistónar, Frímann Gunnarsson og Þryðjy Kossynn. Kynnir kvöldsins verður Þorsteinn Guðmundsson.

Þryðjy Kossynn er húsband Þjóðleikhússins og er skipað tæknimönnum þess. Halldór hefur spilað með bandinu á gítar og stefnir á að taka lagið með þeim.

„Það er svo fallegt að allt starfsfólkið í húsinu ætlar að gefa vinnuna sína þetta kvöld, það leggjast allir á eitt,“ segir Sigurlaug en Halldór fer á næstunni í erfiða stofnfrumumeðferð. „Við vitum að þetta er mjög kostnaðarsamt og erfitt fyrir fjölskylduna. Þetta er það minnsta sem við getum gert fyrir góðan félaga.“

Tónleikarnir verða haldnir á stóra sviði Þjóðleikhússins og er miðaverð 2.900 krónur en allur ágóði af miðasölu og barsölu þetta kvöld rennur óskiptur til Halldórs og fjölskyldu hans. Miða er hægt að nálgast á Midi.is.