Þingmenn vilja afturkalla aðildarumsókn

Atli Gíslason og Jón Bjarnason lögðu í dag fram þingsályktunartillögum um að afturkalla umsókn Íslands að Evrópusambandinu (ESB). Þeir leggja til að ekki verði haldið áfram með aðildarviðræðurnar fyrr en fram hafi farið þjóðaratkvæðagreiðsla sem staðfestir vilja þjóðarinnar til aðildar.

Tvímenningarnir telja umboð ríkisstjórnarinnar til að halda áfram aðlögunar- og aðildarvinnu ekki lengur fyrir hendi.

Helsta ástæða þess er sú að þau skilyrði og þær forsendur sem leiddu til þess að sótt var um aðild árið 2009 séu ekki lengur fyrir hendi.

Einnig telja þeir aðildarviðræðurnar kostnaðarsamar og að þær feli að ýmsu leyti í sér fyrirfram aðlögun að reglum sambandsins.

Þá telja þeir ESB hafa skipt sér af innanríkismálefnum Íslands í gegnum viðræðurnar og nefna sem dæmi makríldeiluna og Icesave-málið.

Loks nefna þeir að forsendur á Evrópusambandssvæðinu hafi breyst á síðustu árum og meðal annars hafi gjaldmiðill svæðisins magnað upp vanda ríkjanna og stefnt þeim í átt að gjaldþroti.