Þingmaður Sjálfstæðisflokksins: Óskaplega mikið af nefndum

Birgir Ármannsson, þingmaður Sjálfstæðisflokksins, segir að óskaplega mikið af ýmsum nefndum, ráðum og starfshópum hafi verið skipuð frá því að ríkisstjórn Samfylkingarinnar og VG tók við völdum 1. febrúar í fyrra.

Birgir vill fá skýrari mynd á þetta starf og lagði því fram fyrirspurn á Alþingi í dag um þessa hópa. „Tilgangur fyrirspurnarinnar er fyrst og fremst að fá fram hvert umfangið er, hver kostnaðurinn er og um leið að átta sig á tilgangi nefndarstarfsins," segir Birgir.

Aðspurður segist Birgir telja að báknið hafi svolítið belgst út frá því að ríkisstjórnin tók við völdum. „Ég hef auðvitað engar tölur í höndunum um þetta en tilgangur fyrirspurnarinnar er að fá upplýsingar sem hægt er að nota til þess að átta sig á heildarmyndinni í þessum efnum," segir Birgir.