Talar þú við ferðamenn?

Þú kannski starfar líka í ferðaþjónustu? Kannski á gististað eða í afþreyingu, leigir út bíla eða selur veitingar, já eða olíu á bílinn? Ef þú svarar framangreindum spurningum jákvætt er það líka þitt hlutverk að gefa þeim ferðamönnum sem þú talar við upplýsingar. Ekki eingöngu um náttúruperlur sem fram undan eru eða mögulega veitinga- og gististaði heldur líka um aðstæður á svæðinu.

Í september komu rúmlega 70.000 ferðamenn til landsins sem var um 13% aukning frá fyrra ári samkvæmt tölum Ferðamálastofu. Ekkert bendir til annars en að einhver, jafnvel álíka, aukning verði á komandi vetrarmánuðum. Það merkir að tugir þúsunda ferðamenn verða á ferðinni í hverjum mánuði að njóta þess sem landið hefur upp á að bjóða.

Við Íslendingar þekkjum ágætlega aðstæður hér á landi, hálku sem getur myndast að kvöldlagi eftir rakan dag, skafrenning sem fýkur yfir veginn sem annars er auður og vindhviður sem hrista bílinn þegar ekið er meðfram fjöllum. Svo ekki sé nú talað um rok og rigningu, slagveður sem getur verið svo kraftmikið að ekki er stætt. Við þekkjum líka þá staðreynd að þó veður sé skaplegt á láglendi getur geisað ofsaveður þúsund metrum hærra þegar til fjalla er komið.

En þessu gera erlendir ferðamenn sér ekkert endilega grein fyrir né þeirri staðreynd að veður getur breyst úr blíðu í ofsaveður á örfáum klukkustundum. Þar kemur þú inn, þú sem talar við ferðamenn og hefur tækifæri á að upplýsa um hálkuna eða hvassviðrið sem er spáð á næstu klukkundum. Enn frekar hefur þú tækifæri á að upplýsa um staðbundnar aðstæður sem þú sem heimamaður þekkir betur en nokkur annar.

Hlutverk allra

Það verður að vera hlutverk allra þeirra sem starfa í og koma að ferðaþjónustu að upplýsa ferðamenn um aðstæður hverju sinni. Taka sér eina mínútu og ræða sérstaklega við ferðamanninn um hvert förinni er heitið og benda á hvað þarf að hafa í huga ef aðstæður gætu verið annað en eðlilegar. Mikilvægt er þá að setja sig í spor ferðamannsins sem kannski hefur enga reynslu af snjó, hálku eða íslensku votviðri, svo ekki sé nú talað um sandstorma.

Það er því miður svo að fjármagn er ekki til staðar til að halda uppi nauðsynlegri þjónustu við sívaxandi fjölda ferðamanna sem hingað koma. Má þar nefna að ekki er rutt nema fimm daga í viku að Gullfossi, merkingum er víða ábótavant og fleira mætti tína til. Vilji allra sem að þessum málaflokki koma er þó mikill í þá átt að bæta úr því sem þarf. En þetta setur enn meiri kröfur á þá sem upplýsa ferðamenn. Það verða allir að vita að Gullfossvegur og bílastæði við Gullfoss eru ekki rudd á þriðjudögum og laugardögum.

Ef færð er erfið eða slæm þarf að benda ferðamönnum á að fara ekki á þær slóðir svo eitt dæmi sé tekið.

Á vefsíðunni safetravel.is sem rekin er af Slysavarnafélaginu Landsbjörg með stuðningi ýmissa aðila má finna helstu upplýsingar sé eitthvað athugavert við færð og veður hér á landi. Á vefsíðu Vegagerðarinnar vegagerdin.is má finna upplýsingar um færð á vegum og á vedur.is, vefsíðu Veðurstofunnar, má finna greinargott yfirlit yfir veðurspár komandi daga.

Viðbragðsaðilar eins og lögregla og björgunarsveitir hafa að vetrarlagi síðustu árin sinnt hundruðum ferðamanna sem lent hafa í vandræðum, fest bíla í ófærð, villst af leið eða lent í hrakningum utan alfaraleiða. Réttar og góðar upplýsingar um aðstæður hverju sinni eru lykilþáttur í því að fækka þeim tilfellum. Þá upplýsingagjöf þurfa allir sem koma að ferðaþjónustu að tileinka sér.