Sýknudómur í nauðgunarmáli stendur óbreyttur

Sýknudómur Héraðsdóms Reykjavíkur yfir manni sem ákærður var fyrir nauðgun á sextán ára stúlku árið 2011 skal vera óraskaður. Þann úrskurð kvað Hæstiréttur upp í dag.

Manninum var gert að sök að hafa haft samræði og endaþarmsmök við stúlkuna og notfært sér ölvun hennar og svefndrunga til þess. Héraðsdómur taldi á sínum tíma ekki hafið yfir skynsamlegan vafa að maðurinn hefði nauðgað stúlkunni, meðal annars vegna ósamræmis í framburði konunnar og í ljósi þess að þau eru ein til frásagnar um atburðina, en einn dómari skilaði sératkvæði og taldi að sakfella ætti manninn.

Í dómi Hæstaréttar frá því í dag segir að Hæstiréttur geti ekki endurmetið niðurstöðu héraðsdóms um sönnunargildi munnlegs framburðar nema hlutaðeigandi vitni eða ákærði gæfu skýrslu þar fyrir dómi. Þá taldi dómstóllinn engin önnur gögn málsins benda til þess að niðurstaða héraðsdóms um framburðinn fyrir dómi kynni að vera röng svo að einhverju skipti.

Segist hafa vaknað í alblóðugum nærbuxum

Ákæran snýr að atburðum aðfaranætur sunnudagsins 11. september 2011.  Konan sem þá var sextán ára, Elísabet Segler, sagði sína hlið sögunnar í pistli sem birtist meðal annars á Vísi árið 2014.

Elísabet segist hafa farið heim með manninum af skemmtistaðnum Prikinu og næst muna eftir sér í íbúð hans þar sem hann hafi verið ofan á henni og ýtt höfði hennar niður. Hún segir að síðast er hún vaknaði hafi kjóll hennar verið tekinn niður fyrir brjóst, sokkabuxur hennar rifnar og nærbuxurnar alblóðugar. Maðurinn hafi sagt að hún „mætti fara núna“ og hún hafi þá hlaupið út.

Hún leitaði til Neyðarmóttöku daginn eftir og skýrsla frá 12. september greinir frá áverkum hennar. Hún lagði ekki fram ákæru fyrr en í janúar 2013, sextán mánuðum eftir atvikið. Gaf hún þá skýringu fyrir héraðsdómi að hún hefði viljað „loka á þetta“ og að hún hafi síðar frétt að maðurinn hefði nauðgað öðrum stúlkum. Hún hafi þá fengið samviskubit og ákveðið að kæra.

Maðurinn segist hafa farið heim með konunni af Prikinu en að ekkert kynferðislegt hafi átt sér stað á milli þeirra. Hún hafi „algjörlega rotast“ og hann ekki getað vakið hana. Hann hafi svo sjálfur sofnað og vaknað þegar hún yfirgaf íbúðina daginn eftir.