Strákarnir geta vel við unað
Róbert Gunnarsson og aðrir í landsliðinu taka hér vel á móti Rúnari Kárasyni eftir að hann var valinn besti leikmaður íslenska liðsins annan leikinn í röð.
Mynd/Vilhelm
Fyrri hálfleikur gegn Frökkum í gær var frábær. Sóknarleikurinn stórkostlegur eins og oftast á þessu móti, vörnin sterk og Björgvin magnaður í markinu. Strákarnir náðu mest sex marka forskoti, 12-6, en misstu þann mun niður í þrjú mörk fyrir hlé. Hálfleikstölur 15-12 en íslenska liðið hefði hæglega getað leitt með meiri mun enda virtust frönsku leikmennirnir engan veginn nenna því að spila leikinn.
Frakkarnir rifu sig upp í síðari hálfleik og voru komnir yfir, 16-17, eftir aðeins sex mínútur í seinni hálfleik. Eftir það var leikurinn mjög jafn og jafntefli sanngjörn niðurstaða. Strákarnir misstu þó af mjög góðu tækifæri til þess að leggja loksins Frakkana.
Miðað við áföllin sem liðið hefur orðið fyrir er árangurinn í Serbíu virkilega góður. Liðið fór út án helstu leiðtoga liðsins og svo var Alexander Petersson ekki með í milliriðlinum og í engu standi í riðlakeppninni. Þess utan var lykilmaður varnarleiksins, Ingimundur Ingimundarson, meiddur og spilaði minna af þeim sökum.
Þjálfarinn segir að sóknarleikurinn á mótinu hafi verið sá besti sem liðið hefur sýnt lengi og hver átti von á því með Ólaf Stefánsson og Snorra Stein fjarverandi? Sóknarleikurinn var algjörlega magnaður. Aron er ekki bara efnilegur lengur heldur frábær leikmaður, Arnór Atlason alveg magnaður að öllu leyti og Guðjón Valur virðist ekki geta spilað illa á stórmóti. Frábær. Ásgeir Örn steig inn og skilaði góðu verki, Þórir traustur og Róbert virkilega sterkur á línunni.
Í vörninni var Vignir Svavarsson að spila líklega sitt besta stórmót, Sverre fór vaxandi og þeir Arnór og Ásgeir Örn líka öflugir. Björgvin var lengi í gang í markinu en sýndi mikinn karakter með því að rífa sig upp og skila góðum leikjum í seinni hlutanum.
Ánægjulegast af öllu er síðan innkoma nýliðanna sem allir hafa tekið miklum framförum. Rúnar hefur sýnt að hann hefur alla burði til þess að verða frábær. Gríðarlegur skrokkur, föst skot og sjálfstraustið í lagi. Verður gaman að fylgjast með honum í framhaldinu.
Kári er orðinn fullskapaður línumaður í hæsta gæðaflokki og Ólafur Bjarki sýndi að hann er tilbúinn. Allir flottir.
Þegar upp er staðið getur liðið vel við unað. Það vantaði ekki mikið upp á að það færi enn lengra, en frammistaðan lofar góðu fyrir næstu mót.
- Fréttir
- Sport
- Viðskipti
- Lífið
Nýjast á Vísi
Fréttir eftir mánuði
Hér má finna fréttir eftir mánuði.
- Sími 512 5000
- Hafðu samband
- Starfsfólk
- Umferð
- Veftré
- Auglýsingar
- 365 Skaftahlíð 24 105 Reykjavík Sími: 512 5000