Innlent

Stjórnarþingmenn saka Stundina okkar um pólitískan áróður

Sunna Kristín Hilmarsdóttir skrifar
Karl Garðarsson og Elín Hirst virðast ekki hafa verið hrifin af Stundarskaupinu sem sýnt var á RÚV á gamlársdag.
Karl Garðarsson og Elín Hirst virðast ekki hafa verið hrifin af Stundarskaupinu sem sýnt var á RÚV á gamlársdag. vísir
Karl Garðarsson, þingmaður Framsóknarflokksins, og Elín Hirst, þingmaður Sjálfstæðisflokksins, segja pólitískan áróður hafa verið borinn á borð fyrir börn í Stundarskaupinu á gamlársdag en um er að ræða áramótaþátt Stundarinnar okkar. Þingmennirnir rita aðsenda grein í Fréttablaðinu í dag undir yfirskriftinni „Friðhelgin rofin.“

Í greininni segja þingmennirnir að í Stundarskaupinu hafi verið innslög sem hafi litast mjög af pólitískum áróðri, „en áttu á sama tíma lítið sem ekkert skylt við barnaefni.“ Elín og Karl taka dæmi af innslögum sem þau telja að hafi verið til þess fallin að koma þeim skilaboðum til barna að ríkjandi valdhöfum væri „ekki treystandi og að þeir vildu eyðileggja grunnstoðir samfélagsins.“

„Í barnaþættinum mátti sjá forsætisráðherra og fjármálaráðherra þeysast um á gjöreyðingarskipinu „einkavæðarinn“ og tortíma bæði Landspítalanum og Ríkisútvarpinu, á milli þess sem þeir gerðu lítið úr heilbrigðisstarfsmönnum. Á öðrum stað í þættinum mátti heyra hvað Eyþór Arnalds hefði verið „leiðinlegur“ á árinu, en þannig vildi til að hann sat í nefnd sem skilaði af sér svartri skýrslu um fjárhag Ríkis¬útvarpsins í fyrra. [...] Pólitískur áróður af hálfu Ríkisútvarpsins sem beinist að börnum er með öllu óásættanlegur, óháð því hvaða stjórnmálamenn eða flokkar eru þar gerðir að bitbeini,“ segja þingmennirnir í grein sinni.

Að mati Elínar og Karls hefur RÚV „með þessu áróðursbragði“ rofið það sem þau kalla „friðhelgi um pólitískt afskiptaleysi sitt gagnvart börnum, og brást um leið lagalegum og siðferðislegum skyldum sínum.“

Þess vegna kalla þingmennirnir eftir því að stjórnendur og starfsmenn RÚV svari því hvort að þeirra mati sé ásættanlegt „að pólitískum áróðri sé komið fyrir í barnaþáttum þess.“

Leikarinn Guðjón Davíð Karlsson er umsjónarmaður Stundarinnar okkar og skrifaði hann handritið að Stundarskaupinu ásamt þeim Braga Þór Hinrikssyni, sem var leikstjóri þáttarins, og Sverri Þór Sverrissyni, sem er betur þekktur sem Sveppi. Þáttinn má sjá hér.


Tengdar fréttir

Friðhelgin rofin

Börnin læra það sem fyrir þeim er haft. Fram til þessa hefur ríkt samstaða um það að stjórnmálasamtök stundi ekki pólitískan áróður gegn börnum í gegnum stofnanir ríkisins.




Fleiri fréttir

Sjá meira


×