Stjórnarfylgið minna en fyrst eftir hrunið

Stuðningurinn við ríkisstjórn Jóhönnu Sigurðardóttur er 38,9 prósent, samkvæmt skoðanakönnun Fréttablaðsins á fimmtudag.

Þetta er minnsta fylgi ríkisstjórnarinnar frá því að hún tók við völdum 1. febrúar á síðasta ári. Í fyrstu könnuninni sem gerð var eftir myndun stjórnarinnar mældist fylgið 55 prósent.

Stuðningurinn við ríkisstjórnina er minni en síðustu ríkisstjórnir eiga að venjast, þó til séu dæmi um slíkar tölur. Í ársbyrjun 2008, þegar stjórn Sjálfstæðisflokksins og Samfylkingarinnar, undir forystu Geirs Haarde, hafði starfað í tæpt ár studdu hana sjö af hverjum tíu. Um sumarið það ár var stuðningurinn kominn í rétt rúm 50 prósent.

Þremur vikum eftir hrun bankanna, í október 2008, mældist stuðningur við stjórnina 41 prósent. Mánuði síðar var hann kominn niður í 32 prósent og í janúar 2009 var hann 20 prósent. Fáum dögum eftir þá könnun fór stjórnin frá og Samfylkingin og VG mynduðu minnihlutastjórn undir forystu Jóhönnu Sigurðardóttur.

Stuðningurinn við ríkisstjórnina nú er áþekkur þeim er stjórn Sjálfstæðisflokks og Framsóknarflokks mældist með í febrúar 2007. Því stjórnarsamstarfi lauk eftir kosningarnar þremur mánuðum síðar.

Úr þessum niðurstöðum má lesa að almenningur hefur orðið fyrir vonbrigðum með störf ríkisstjórnar Samfylkingarinnar og VG. Um 55 prósenta stuðningur við upphaf samstarfsins bendir til að talsverðar væntingar hafi verið bundnar við stjórnina en 39 prósentin nú sýna að hún hafi ekki staðið undir þeim væntingum.

Ekki er óvarlegt að ætla að Icesave, atvinnumál og skuldaúrræði ráði talsverðu um afstöðu fólks til stjórnarinnar en þau mál hafa verið í brennidepli síðustu vikur og þykir mörgum hægt ganga. Vert er að benda á að könnunin var gerð degi eftir að ríkisstjórn kynnti úrræði sín til hjálpar heimilunum. bjorn@frettabladid.is